Paris Saint-Germain forward Neymar chu a club hlui Barcelona nen sawi zawm ni mah se, Barcelona manager Xavi chuan Neymar hi an ruahmannaah a tel lo tih a sawi.

Brazil international hian tun nipuiah PSG a chhuahsan a rinawm zual zel a, a kalna tur lam la chiang lo hle mah se, Barcelona-ah erawh a kir dawn lo tih a chiang.

Xavi chuan Neymar leh Barcelona sawi zawm an nih chungchang zawhna chhangin, “Kan club nena sawi zawm a ni hi mak ka ti a, kan ruahmannaah a tel lo. Thian angin Neymar hi ka ngaina a, mahse ngaih pawimawh dang kan nei ve ve,” tiin Twitch in an kawmnaah a sawi.

Neymar hi Manchester United, Chelsea leh Newcastle nen te pawh sawi zawm a ni a, mahse Premier League lamah a luh a rinawm lova, Saudi Arabia lam nen pawh an indawr nia sawi a ni.

Kum 31 mi hian PSG-ah kum hnih daih contract a la nei a, PSG hian an duh chuan a contract hi kum khat dangin an pawhsei sak thei bawk. PSG supporter te lakah Neymar hi a tla na tawh lo hle a, an supporter ten chhuak turin an duh nghe nghe.

PSG hian Neymar hi nipui bazar inhawn hunah hralh an tum nia sawi a ni a, Neymar hian PSG a chhuahsan a nih pawhin Europe-a la awm zel a duh niin chanchinbu thenkhat chuan tarlang mah se, Saudi lamah hlawh thahnem tak hlawh tura a kal hreh a rinawm loh.

Saudi lam atanga Neymar dawrtu hi tarlan a ni lova, mahse Neymar hi hlawh tam tak nena thlem an tum nia tarlan a ni a, Neymar hian Cristiano Ronaldo leh Karim Benzema te hnung zuiin Middle East lam a pan lovang tih a sawi theih loh a ni.