Barcelona President Joan Laporta chuan an midfielder Frankie de Jong chu hralh an tum loh thu Barca TV in an kawmnaah a sawi.
Kumin nipui transfer lai khan Barca hian De Jong chu an club sum dinhmun a that zawk theih nan hralh mai an tum ut ut hman a. Tunah pawh an dinhmunin ziaawm lam la pan thei lo mah se an president berin an midfielder kum 25 a upa hi hralh an tum loh thu a sawi leh tawh.
Barca TV in Laporta an kawmnaah, “Kan midfielder te zingah hian Frankie de Jong hi hralh kan duh ngai loh te zing ami a ni. Kan player theihna nei sang takte zinga pakhat a ni a, a la naupang bawk a, kan team kaihruaitu pawimawh tak pakhat a ni,” tiin a sawi.
De Jong hi Barcelona boss Xavi-a hnuaiah player pawimawh tak a ni a, kum lo la awm leh zel turah pawh hian he club-a la cham tur hian an duh bawk a. Hetiang a nih chuan Manchester United lei hual leh an awh em em, an midfielder Casemiro dinpui tura an lo hual hi January-ah chuan Nou Camp lamah a la cham hmel hle.
Erik ten Hag-a’n Ajax atanga Man Utd a zawm tirh khan Ajax-a alo enkawl tawh thin De Jong hi lakluh a tum nghal ngat ngat a. Barcelona-in De Jong lei nana a man an bituk zat pawh United lam hian pek an inhuam viau a, mahse De Jong ber hian Catalan club hi chhuahsan a duh tlat loh avangin an lo hlawhchham tawh a nih kha.
De Jong an lakluh theih tak si loah chuan rin loh tak maiin United hian Real Madrid atangin Casemiro an la lut ta nawlh a. United tantu tam tak chuan an club-a lo lut duh lo Dutchman hi an mamawh tawh bik lo angah an inngai hman. Mahse an ring sual chiang hle.
United hian Michael Carrick-a hnuah defensive-midfielder mumal tak an nei leh tawh meuh lo a, Brazilian Casemiro hian chu an mamawhna chu a rawn phuhruk teh meuh mai. Number 10 role khel thei turin Bruno Fernandes an nei bawk a, Mahse, an pahnih inkara khel thei tur midfieder pangngai tak an la mamawh reng a ni.
Christian Eriksen pawh United lak luh thar zingah hian a tel a, tun season chhungin a khel chhe zawk zawk hran lo, chance hlauhawm tak tak a siam a, inkhel pawh a thunun viau. Amaherawhchu, Eriksen hian a teammate-te tan ball tha tak takin pe thei mah se a che a muang deuh a, midfielder ball keng thei kan tih ang kha a ni lo bawk, hemi avang tak hian United-in Netherlands international De Jong an mamawhna hi a awm lo hran lo.
Barca TV-in kawmnaah hian Laporta hian an midfielder hun rei tak atanga Barcelona innghahna ni tawh Sergio Busquets chu contract thar ziahpui leh theih a duh thu a sawi tel bawk a, chhuahtir mai an la tum loh thu a sawi a ni.
