Cristiano Ronaldo chu tun hnaiah Juventus chuan Barcelona hnenah an zawrh niin thu thang a awm mek.
Portuguese star Cristiano Ronaldo chuan Real Madrid a chhuahsan hnuah Juventus a zawm a, The Old Lady hi season hnih chhung chu a awm chilh ve ta a. Tun hnaiah thu thang a awm mek a, kum khata £28 million lai hlawhtu Ronaldo chu hmun danga chhuahtir dan an dap niin an sawi.
Spain rama journalist pakhat Guillem Balague chuan Juventus in Cristiano Ronaldo hi hralh an tum niin a sawi a, BBC hnenah Serie A champion hian Portuguese star hlawh an pek hnem em avangin club dang hnena kaltir mai hi an duh niin a sawi chhuak.
Italy ram a pan hnuah Cristiano Ronaldo chuan game 89 a khel tawh a, hengah hian goal 65 zet chu a thun hman a, mi goal thun tur pawh vawi 18 chu a siamsak tawh bawk a ni.
Guillem Balague chuan, “Juventus chuan Cristiano Ronaldo hi hlawh an pe sang hle a, hei vang hian an sum dinhmun siam that theihna a nih beiseiin club hrang hrang hnenah an zawrh mek a, hetianga an zawrh zingah hian Barcelona pawh an tel,” tiin a sawi.
“An beisei ang ngawta awlsam chuan Juventus hian Cristiano hi an hralh a rinawm vak lo a, a hlawh a tam tham si a, tunlaia club hrang hrang sum dinhmun tlakhniam lai hian khawi club mahin hlawh sang tak pe tur chuan an la lut ngam kher lo ang,” a ti bawk.
Barcelona chu coronavirus vanga sum dinhmun tlahniam zingah an tel ve chiang a, hei vang hian transfer window inhawn laiin player man to deuh chu an tan lak ngaihna a awm hmel loh hle a. La Liga champion Real Madrid el pha tura chet theih an duh viau a, pawisa erawh hman vak an tum lo thung.
Tlar hmaa Lionel Messi leh Cristiano Ronaldo te inkawp chu khawvelin an hmu chak ngei dawn a, a takah thleng thei se duhthusam pawh a nih a rinawm a. Chutih rualin kumin nipui transfer window inhawn lai chuan a tak ramah a thlen a beiseiawm lem lo hle a ni.
Juventus hian manager thar atana Andrea Pirlo an rawih hnuah an player neih sa hralh chhuah duh an nei nghal a, Aaron Ramsey leh Paulo Dybala te chu hralh tura an chhawp chhuah hmasak an nih hmel hle.