Barcelona hian Lakers vanglai min ti hrechhuak- Kobe Bryant.

16th March 2016, 05:03AM

Los Angeles Lakers guard tun NBA season tawpa basketball chawlhsan tawh tur Kobe Bryant chuan Barcelona inkhel a en chang chuan Lakers vanglai a hriatchhuah thin thu a sawi chhuak.

Kobe hian he thu hi Thierry Henry nen New York-a an inkawm tumin a sawi chhuak a, Kobe chuan," Nomawi tam tak an chawi leh theih ka ring. Club dang nen hian an khelh dan phung a dang daih a ni.

" Phil Jackson hnuaiah khan Lakers hian game rang tak kan khel thin a. Kan khelh dan phung khan hlawhtlinna nasa tak min pe a ni. Spurs ho ball rang taka an in pe kual thin nen pawh hian a in ang viau bawk. Kan awmna tur hmuna kan awm tawh chuan kan teammate-te hian an tih tur an hre chiang hle a ni. Player theihna sang tak nei leh inthlak kual zung zung thei kawl hi chu dan an har hle." tiin Barcelona tha a tih zia a sawi.

Kobe hian Lakers hi NBA title tum nga zet a chawipui a. Kum 2000, 2001 leh 2002 khan a zawnin an champion nghe nghe a ni. Kobe hi Mizoram a basketball ti lar tak tak tu a ni ti ila kan sawisual tam lo hle ang.

Copyright © inkhel.com 2024. All rights reserved.