La Liga chuan Barcelona sum hman theih zat Salary Cap chu €204million (£174.8m)-ah a tihniam ta duai mai le, nipui bazar a rawn ni vat dawn a, Barcelona hian player thar lakna tur an nei mang dawn lo tihna a ni.

Club leiba ngah dan atang te, an sum lak luh leh hmanna atang tein Salary cap hi bituk thin a ni a, season khat chhunga an sum khawih chet theih zat tur bitukna a ni ber.

Thawhlehni khan La Liga chuan Salary Cap thar a tichhuak a, nikum September thlaa Barcelona Salary Cap €270m (£231m) chu tihhniam sak lehin, tihhniamna hi €66m lai a ni nghe nghe.

Nikum February thla khan Barcelona Salary Cap chu €648m (£555m) lai a la ni a, mahse tunah zet zawng, a tlahniam nasa ta duai duai hle mai.

January transfer window inhawn lai khan Barca chuan Victor Roque chiah an la lut a nih kha, ani man kha €30m niin, La Liga-ah an ziak lut thei hlauh mai, hei pawh a chhan chu Gavi inhliam vang a ni a, Spanish midfielder hi tun season chhung chu a hmel kan hmu thei tawh dawn lo a ni.

2023-24 season chhunga Barcelona-in an squad atana sum an sen chu €492m (£421m) vel nia report a ni a, hei pawh hi nasa taka an inhrek hnu niin, player thar lakna tur hi an nei lo tluk a ni.

An club TV Rights an hralh then avangin Ilkay Gundogan, Oriol Romeu leh Inigo Martinez te kha an la lut thei a, tun season-ah La Liga title an lak a beiseiawm chiah tawh si loh. Champions League lama an chetha lo a nih phei chuan, nipui bazar inhawn hunah sum hman tur an nei tlem tawh dawn hle a ni.

La Liga Salary Cap nei sang ber chu Real Madrid niin, €727m (£623m)-a bituk sak an ni a, a dawtah Atletico Madrid awmin, anni Salary Cap hi €303m (£259m) a ni.