Barca player te’n Pogba an duh thu an sawi

18th October 2018, 10:10PM

Barcelona player thenkhat chuan Paul Pogba chu an club player ni tura an duh thu an sawi a. France star hian Camp Nou a luhchilh thei a nih chuan an club chuan nasa takin an tangkaipui an beisei thu an sawi.

France national team lamah Paul Pogba chuan Samuel Umtiti leh Ousmane Dembele te chu a khelhpui mai bakah a thian tha takte an ni a. Anni piah lamah hian thawm nei lian deuh Gerard Pique leh Lionel Messi te chuan Pogba an duh thu hi an sawi ri a ni.

Barca manager Ernesto Valverde pawhin Manchester United atanga Paul Pogba lak hi a hreh loh thu a lo sawi ve tawh a, mahse scout te chu French midfielder chungchangah hian an rilru a la phir a, an club in tika-taka an hmachhuan ang hmelhriat ve thei lo tura ngaihna a lian rih a, hei vang hian Pogba chu duh tho mahse an bawh huam rih lo a ni ber.

Thlirna kawng hrang hrang hmanga an thlir hnuah Pogba chu technical leh physical lamah a tha tawk chuan an hria a, mahse Old Trafford chhuahsan tur chuan Barcelona sum tlang a hek nasa dawn hle niin a ngaih theih a. Barcelona hian tun season chhungin €960 million (£843 million) vel la lut thei turah an inbeisei a, hengah hian an hlawkna chu €11 million (£9.6 million) vel a ni thei dawn a ni.

Manchester United chuan Old Trafford a Paul Pogba an seng luhna £89 million kha hmuh let leh ngei an tum dawn a. Pogba agent Mino Raiola chuan Pogba hlawh bakah sum tam tham tak a phut ve ngei a rinawm bawk a, hei vang hian Barcelona hian lei duh pawh ni se an sum sen tur chu a tam tham hle tura ngaih a ni.

Copyright © inkhel.com 2024. All rights reserved.