14 Jan 2020 11:02

bakteaJr.

Mizo tlangval

Barca manager thar Setien

Barcelona chuan an manager Ernesto Valverde chu banin, an manager thar atan Quique Setien chu an lalut chhunzawm nghala, Setien hian Camp Nou-ah kum hnih leh a chanve daih contract a ziaka, kum 2022 thleng a daih.

Barcelona hian an manager chhawr lai hi season laklawhah an ban khat hle a, kum 2003 January thlaa Louis Van Gaal an ban hnuah Valverde chu season laihawla an manager ban leh hmasak ber a ni.

Barcelona hian La Liga lamah hma hruai mek mahse Valverde chuan Barca hotute a hmin thei ta chuang lova, Barcelona hian Spanish Super Cup semi-final a Atletico Madrid an hneh loh hnuah Valverde-a dinhmun chu derthawng zuala, ban a ni zui ta bawk.

Barca manager thar kum 61 mi Setien hi La Liga lamah a mikhual lo hle a, kum 2015 khan Las Palmas chu relegate mai tur an nih laiin a chhanchhuak tawha, kum 2018 khan Real Betis chu Euopean competition khel turin a tlinpui bawk.

Season liamta khan Setien hian Real Betis chu Barcelona, Real Madrid leh Atletico Madrid lakah hnehna chanpui mahse season zawh ruala ban a ni a, kum chanve vel a awl hnuah Barcelona chuan an ruai ve leh ta a ni.

Barcelona manager thar tur hian an player hlui Xavi hming te pawh ri mahse Xavi hian club enkawl lai a neih avangin Barcelona hian tun season zawh tal an nghah a ngai dawna, Barca hian tunah manager thar an duh avangin Setien hi an lalut ta zawk a ni.