Barca kan hneh ngei ngei a ngai: Vertonghen

11th December 2018, 10:12PM

Jan Vertonghen chuan UEFA Champions League a Tottenham Hotspur leh Barcelona inkhelh hunah Lionel Messi a tel emaw, tel lo emaw pawh ni se Spurs chuan Barca chu an hneh a ngaih thu a sawi.

Barcelona chuan Camp Nou ah Premier League club hi an mikhual dawn a, he inkhel tur hi Tottenham tan chuan a pawimawh hle. Catalan club te hi knock out stage khel thei turin an tling tawh a, Spurs erawh an dinhmun a la chiang ve chiah lo deuh a, Barca laka an chet danin a hril thei dawn chauh a ni.

Tottenham tan hian knock out stage lut turin beisei a sang thei vak rih lo hle a, Spurs defender Jan Vertonghen chuan North London club tan chuan chak ngei a pawimawh thu a sawi chhuak a. Barcelona chuan Lionel Messi an khelhtir emaw, khelhtir lo emaw pawh ni se English club tan chuan Spanish club chu an hneh hrim hrim a pawimawh thu a sawi chhuak a ni.

Vertonghen chuan, “Barcelona hian kan inhmachhawn hunah Lionel Messi hi substitute bench-ah an thuttir a nih chuan ka phun nawi lo khawp ang a. Mahse, Messi telin emaw, tel lo emaw pawh ni se hneh ngei kan tum dawn a, kan hneh ngei a ngai a ni,” a ti.

“Barcelona chu an tlang tawh avangin kan inkhelh hunah an player tha te an chawlhtir a nih chuan a lawmawm a ni mai a. Player thenkhat chawlhtir mahse team hmachhawn harsa tak an nihna a bo dawn chuang lo a, keimahni lam hian theihtawp kan chhuah a ngai dawn tho tho a ni,” a ti bawk.

A sawi zelnaah, “A tha thei ang bera kan khelh ngei a ngai dawn a, a hma pawhin khawvela team tha ber berte pawh kan hneh ve thei a ni tih kan lantir tawh a, tun tumah pawh hian kan ti leh thei ngei ang tih hi ka ring tlat a. Nikumah pawh khatih laia khawvela club tha ber Real Madrid lakah tha takin kan khel thei a, tun tumah pawh hian kan theih lohna tur ka hre lo,” a ti.

Copyright © inkhel.com 2024. All rights reserved.