Nikum nipui lai leh kumin kum thlasik bazar lai te khan Barcelona chuan Chelsea winger Willian chu nasa taka an dawr thu chanchinbu mite chuan an tarlang nasa hle a, kumin nipui lai pawh khan Barca hian Brazilian winger hi lakluh an tum leh niin sawi a tam.

Chelsea hian an winger hi an chelha, sum tam tak nen Barca hian kum 31 mi hi dawr mahse Willian hian Stamford Bridge-ah contract thar a ziak ta zawk.

Willian hi nakkum nipui hian Chelsea-a a contract a hmang zo tawh dawna, contract thar ziah duh mahse Chelsea hian an zawrh dawn em tih sawi theih a la ni lova, contract thar a ziak lo a nih chuan Willian hi nakkum nipuiah free agent a ni dawn.

Willian chuan, “Nikum khan World Cup zawh khan official taka min dawrtu pakhat chiah ka nei a, chu chu Barcelona an ni. Ka chungchangah Barca khan Chelsea kha an dawr ngeia, mahse Cheslea lamin an lo hnar sak. Ka club sawn chungchang kha ka chhungte nena kan sawi ho tum vawi khatna a ni nghe nghe a, mahse London hi nuam kan ti hlea, chhan hrang hrang avangin ka chhuak ta lo a ni,” a ti.

Willian chuan Brazil-ah a kir leh a nih chuan a club hlui Corinthians tana khelh leh a chak thu sawi zuiin, “Brazil-a ka kir leh a ngai a nih chuan Conrinthians tan bawk khelh leh ka chaka, ka pianna leh seilenna hmun a ni a, kum kua ka nih laia ka football career bul intanna a ni a, kan naupan lai hun zawng zawng ka hman ralna hmun a ni.

“Ka tet te atanga Corinthians ka tan tawh a, an tana ka khelh hma daih atangin ka tan tawha, ka chhungte pawhin an tan vek. Corinthians-a ka luh khan ka chhungte an lawm em em a, first team ka chan chhoh hnu phei kha chuan lawm tak an ni,” a ti.