12 Jun 2019 05:48

inkhel

Barca-in tun thla chhungin €60 million hlep an tum

FC Barcelona chuan player hralhna atangin June 30 ral hma ngeiin €60 million vel tal hlep hman an tum niin an sawi.

Barcelona coach Ernesto Valverde chuan transfer window inhawn chhungin player pathum emaw, pali emaw tal lei belh a duh thu a sawi a. Hetiang hi a duh a nih laiin club thuneitute chuan an sum dinhmunin a zir loh deuh avangin an player neih sa thenkhat chu hralh a tul dawn niin an hrilh a ni.

UEFA Champions League-a Liverpool an hneh loh khan Barcelona chuan man to deuha an lei Philippe Coutinho chu hralh an phal zui niin sawi a awm a, Copa America-ah Brazil tan che tha se an ti rilru hle a, Barca chuan Coutinho hi €100 million vela hralh theih an rilruk a ni.

Season thar tan hmain Barcelona chuan €300 million vel tal tuak hman an duh hle a, an duh ang zat sum tuak nan hian player hralh then ngei a ngai dawn a. Chutiang tur chuan Ivan Rakitic leh Samuel Umtiti te chu an hralh chhuah theih tur zinga sawi tel an ni a. Player pahnihte hian Camp Nou-a awm zel an duh thu sawi chhuak mahse club thuneitute chuan sum tuak nan hian an duh hmel hle.

La Liga champion hian player hralh chhuah turte hi an la sawi chiang lem lo a, tlema a chuangtlai deuh chin chu hralh tura an rilruk niin hre chiang deuhte chuan an sawi a. Tun thla tawp hma ngei hian engkim an tih chian tawh a rinawm a ni.

Barca hian Ajax atangin Frenkie de Jong chu €75 million in an be fel a, kum nga chhung atan contract an ziahpui a. Tun hnaiah Atletico Madrid striker Antoine Griezmann chu an thlithlai uluk viau mai a, Atletico chuan July 1 atangin Griezmann hi €120 million vela hralh an phal dawn a. Griezmann bakah hian Matthijs de Ligt nen pawh an sawi zawm mek bawk.

De Ligt hi an la lut thei a nih chuan Samuel Umtiti dinhmun a derthawng pha dawn a. Andre Gomes chu chhuak hma pawl ni tura ngaih a ni a, Portugal midfielder hi nikumah khan Everton chuan an hawh chhuak a, hei vang hian English club thenkhat chuan an melh uluk hle a. Gomes hian West Ham chu a hnar tawh a, Everton hian a ngheta an chelh zui duh a nih chuan €30 million vel an sen a ngai ang.

Denis Suarez, Rafinha, Malcom leh Jasper Cillessen te chu Barcelona hian hralh chhuah ngei an tum hmel hle a. Valencia leh Atletico Madrid te chuan Denis hi an ngaihven mek a, Cillessen chuan a khelh tam theihna hmun zawng turin chhuah a dil tawh bawk a. Catalan club hian Dutch goalkeeper manah hian €30 million an chhiar a ni.

Nikuma Bordeaux atang €40 million senga Malcom an leina ang zat chu Barcelona hian hmuh leh theih an inbeisei a. Atletico chuan Nelson Semedo pawh an hmutai viau a, Portugal right-back hian a contract ah release clause €100 million a nei a, Barcelona chuan hralh phal lo mahse Atletico hian an la chhuak thut thei bawk a ni.