16 Sep 2020 12:23

bakteaJr.

Mizo tlangval

Barca-in player an hralh a ngai

Barcelona chu intuaithar an tum meka, manager thar Ronald Koeman-a enkawlna hnuaia team thar din tum mek mahse, duh angin player an la lut thei lo.

La Liga lam hian an club te khuahkhirh dan chi khat an nei a, player an hralh phawt a nih loh chuan a thar lak luh an remti lova, hei hi Barcelona leh Real Madrid bazar hleihtheih loh chhan niin a lang.

Barca hian Lyon atangin Memphis Depay lak an duha, mimal thilah inremna pawh nei tawh mahse, player an la hralh loh avangin Lyon an la dawr thei lo.

Lyon hian Barca-in Depay an dawrna an thehluh hun hunah an pawm sak nghal dawn niin sawi a ni a, mahse Barca hian an player tu emaw ber an hralh chhuah phawt loh chuan Lyon hnenah Depay an dawrna an thehlut thei rih lo.

Barca hian Rafinha Alcantara leh Luis Suarez te hralh an tum meka, mahse anni hi an la chhuak fel thei rih lova, Barca tan kawng a la inhawng hleithei lo.

Suarez hi Juventus-ah kal tur anga sawi a ni a, mahse Juve hian ram dang player an lakluh theihna quota an hman zawh tawh avangin Suarez hian Italian citizenship a neih phawt a ngai.

Suarez hian Champions League squad thehluh ni hma in Italian citizenship hi a nei hman dawn lo niin sawi a ni a, hemi avang hian Juve hian an lalut dawn rih lo niin sawi a awm bawk.

Barcelona hian an player mamawh tawh loh te chhuah tir tum mahse, coronavirus avangin thil a awlsam lova, Liverpool midfielder Wijnaldum pawh duh mahse engtin mah an la che thei rih lo a ni.