Barcelona chuan an player hlui tuna Paris Saint-Germain tana khel mek Neymar chu lak let tumin an bei tan niin Sky Germany chuan a tarlanga, Barcelona hian an player hlui hi Camp Nou-a hruai kir an tum mek.

Neymar hian kar tir lam khan a chhuah duh thu chu PSG a hrilh tawh niin tarlan a ni a, a hunah training pawh zawm lovin, PSG pawh hian an lungawina tawkna dawrtu an neih chuan Neymar hi hralh chhuah mai an hnial lo bawk.

Barcelona hian Neymar-a manah hian pound maktaduai 90 bakah player pahnih pek tel an phal niin sawi a ni a, an player pek tel phal zingah Philippe Coutinho, Ousmane Dembele, Ivan Rakitic, Nelson Semedo, Malcom leh Samuel Umtiti-te an tel niin tarlan a ni bawk.

PSG hian awlsam takin Neymar hi hralh chhuah an tum bik lova, kum 2017-a euro maktaduai 222 (pound maktaduai 200)-a an lei Neymar-a manah hian pound maktaduai 200 an phut niin tarlan a ni bawk.

Neymar pawh hian Barcelona-a kir hi a duh niin sawi a ni a, mahse a man a to dawn avangin Barca tan hian a khirh ve hle in a rinawm. Barca hian kar hmasa mai khan Atletico Madrid atangin Antoine Griezmann chu manto taka an lo lakluh tawh bawk avangin Neymar-a manah hian sum tam lutuk an thehchhuah ngam a rinawm lova, hemi a nih avang hian player pek tel mai an tum niin a lang.

Neymar hi Barcelona mai bakah Juventus pawhin an dawr mek niin chanchinbu mite chuan an tarlanga, Juventus hian an player duh an lakluh theih riau avangin Neymar pawh hi an lalut leh mai lovang tih a sawi theih loh. Italian leh French chanchinbu te chuan Neymar-a pa leh a agent ni bawk chu Turin khawpuiah Juventus nena indawr turin a awm mek tih an lo tarlang ve mek bawk a ni.