11 Feb 2019 06:20

inkhel

Barca-in Athletic Bilbao an draw hram

La Liga inkhelah champion lai leh hmahruaitu ni bawk Barcelona an inlana, Barcelona hian San Mames-ah Athletic Bilbao tlawhin, team hnihte goal awm lovin an inhnehtawk.

He inkhelah hian Athletic Bilbao an khel tha a, Barcelona an khel thalo zawk a, Barcelona hian point khat an hlawhchhuak hram hi an vannei a tih theih. Barca hian tunah hian khelh 23-ah point 51 an hlawhchhuak tawh a, hma hruai chhunzawm zelin, an hnuai chiaha awm Real Madrid aiin point rukin an fal. Bilbao hian khelh 23-ah point 27 an nei ve thunga, 13-naah an awm mek a ni.

Athletic Bilbao 0-0 Barcelona

Red Card: Oscar de Marcos 90+1’ (Athletic Bibao)

PLAYER RATINGS

Athletic Club - Herrerin 6, De Marcos 6, Yeray 7, Inigo 8, Balenziaga 6, Benat 7, Garcia 6, Susaeta 7, Garcia 7, Yuri 6, Williams 8. Subs - Muniain7, San Jose 6, Kodro 5.

Barcelona - Ter Stegen 9, Semedo 5, Pique 7, Lenglet 6, Roberto 5, Busquets 6, Rakitic 5, Vidal 4, Messi 6, Coutinho 5, Suarez 6. Subs - Vermaelen 5, Alena 6, Dembele 5.

Match Report

Mual neitu lam Bilbao hian 4-2-3-1 formation an hmanga, hmatawngah Williams chuan hma hruaiin a hnungah Sasaeta, Garcia leh Berchiche-te an intlar. Barcelona hian 4-3-3 formation hmangin tlar hmaah Luis Suarez, Lionel Messi leh Philippe Coutinho-te an awm ve thung.

Team hnihte an intum tawka, inkhel pawh a hmuhnawm thawkhat. Tum dang angin Barcelona an che hleithei lova, chak thei ve ve an ni a, vannei emaw vanduai zawk an awm ta lo pawh a tih theih awm e. Barcelona tan goalkeeper Marc Andre ter Stegen a khel tha hle a, point an hlawhchhuah chhan ber pakhat a tih loh theih loh. Minute 20 khelh a nih hma deuhin, Susaeta ball pet tha em em mai chu, a ai tha in Ter Stegen chuan a lo save a, Sasaeta hian a pet that em avangin a pet goal tawh emaw a ti hial maithei. Darkar chanve khelh a nih hma hretin Barcelona an hlauhawm hle a, crossbar an pet per. Bilbao keeper Herrerin chu a line atangin Semedo ti buai turin a rawn chhuaka, hei hi Messi chuan hman tangkai tumin ball chu goal-ah vawrh luh tum mahse crossbar a fuh. Half time hma lawkin Bilbao hian hma an hruai teuh hle a, Garcia chuan a hun tha tak neih a bawhpelh. Bilbao striker Williams a hlauhawm thin hle a, mahse German keeper Ter Stegen a paltlang zo lo. 83mins bawr velah pawh Williams hian chance tha tak a nei leh a, Muniain-a ball pek chu Williams hian goal-a khung ngei tum mahse Ter Stegen chuan a lo save tha lehpek hle. Hun tawp hma injury time-ah Bilbao player De Marcos hnawhchhuah a ni a, mahse hun a tepter tawh bawk nen Barcelona hian an chhawr tangkai hman ta lo a ni.

La Liga bikah Ter Stegen hian shot 34 a hmachhawn tawh atangin 30 a save thei a, a che tha hle. Gerard Pique chuan tun La Liga season kal mekah inkhel bul a la tan veka, ani ang hi Barca player zingah tumah an awm lo. Nikum February thla hnuah a vawikhat nan Barcelona chuan La Liga game-ah goal an khung lo a ni.