11 Jul 2019 10:07

bakteaJr.

Mizo tlangval

​Barca hmain Arsenal zawm ka rilruk thin – De Jong

Barcelona midfielder thar Frenkie de Jong chuan Barcelona hmaa Arsenal zawm phawt a tum thin thu a sawi chhuak.

Kumin January thla khan De Jong-a chungchangah Barcelona leh Ajax-te an indawr fel a, De Jong hi tun thla atang khan Barca player niin, kar hmasa khan Camp Nou-ah phochhuah a ni nghe nghe.

De Jong hian Marc Overmars kal dan anga Ajax atanga Arsenal zawm phawta, chumi zawha Barcelona pan chu a tira a rilru a nih thu a sawi. De Jong chuan, “A hma kha chuan Arsenal-a kal phawt kha ka chak thin a, ka ngaihtuahnaah ka kalkawng zawh duh dan ka suangtuah nasa thin hle bawk.

“A tira ka rilru-a awm dan tak chu Marc Overmars-a kalkawng ang Ajax-Arsenal-Barcelona kha a ni. Mahse Arsenal-a lut phawt lovin Barcelona ka pan nghala, ka ti fuh viau maithei bawk a ni,” a ti.

De Jong-a manah Barca hian a tirah euro maktaduai 75 chu Ajax hnenah an pe phawta a, a chet that dan a zirin Barcelona hian euro maktaduai 9.5 vel lai an la sen belh thei a, kum nga daih contract an ziahpui.

De Jong hi Ajax academy chhuak a ni lova, Willem II chhuak ni zawkin, kum 2015 khan Ajax chuan pound 260,000 in an lalut a, season liamta atang khan khawvel hriat a hlawh chho tak tak a tih theih awm e.

Tuna Ajax director of football ni mek Overmars pawh hi Willem II-ah khel thinin, kum 1992 khan Ajax a pana, Ajax atang hian kum 1997 khan Arsenal zawm lehin, kum 2000 khan Barcelona-in an lalut a ni.