Barca hi title lakpui vek ka tum: Messi

05th December 2018, 01:12AM

Lionel Messi chuan kuminah Ballon d’Or a dawn loh mai bakah a chungnung pathum zingah a lang pha lo a, he chawimawina vawi 6 dawn a tumna chu a tlawlh ta rih a. Hemi hnu hian Barcelona chu title lak theih ang ang lakpui vek a tum thu a sawi.

Argentine superstar Lionel Messi chuan 2018 a hmang tha thawkhat hle a, heti chung hian Ballon d’Or a dawng chuang lo a, pangana a ni pha chauh a. Messi hian mimal chawimawina tih vel hi a tinzawn ber a ni ngai lem lo a, team anga chet that chu a vei ber a nih thu a sawi a ni.

Messi chuan, “Chak loh hi ka duh lo a, hrehawm ka ti thei hle a. Kan inkhelh apiang hian chak ngei tumin ka khel thin a, mimal aiin team hi ka dah hmasa zawk thin a. Team hlawhtlinna chu tanrualna rah chhuah a ni a, kan zavaia kan thawhrim zarah kan chak chauh thin a. Team-ah chuan tu te pawh kan pawimawh vek a ni,” a ti.

Tun season-ah Messi chuan Barcelona chu La Liga hmahruaitu a nihpui leh mek a, UEFA Champions League-ah pawh last 16 ah an inhlang chho tawh bawk a. 2018-19 chhungin lawmman lak tur tam tak a la awm a, Messi chuan a tam thei ang ber lak a tum hle.

“Season thar kan tan hian keimah bik hian theihtawp chhuahin a hma aia tha leh hmasawn zawk nih ka tum thin a, team pawhin hma kan sawn belh theih ngei ka beisei thin,” a ti a.

“A chak theihna apiangah kan chak theih vek ka duh a, chutiang chu Barca ang club-ah chuan miin an beisei tlat a. Miin kan laka beiseina an neih san em avangin kan tan chuan inelna zawng zawnga chak hi kan tum ber tur a ni tawp mai a. Kum tin hma ka sawn belh zel dawn tih rilru ka put avangin hei hian min nawr kal zel a ni,” a ti bawk.

Tun season chhungin Barcelona tan game 16 khelhah Messi hian goal 15 chu a thun tling der tawh a, La Liga leh European title la thei dinhmunah an ding chho mek a ni.

Copyright © inkhel.com 2024. All rights reserved.