Barcelona jersey number 10 pek a nih hnuah Lamine Yamal chuan Barcelona chu kumkhuaa a awmna tur club a nih thu a sawi.

Pathianni liamtaa kum 18 tling hlim Yamal chuan kum 6 chhung atan Barcelona-ah contract thar a ziak a, Ansu Fati-a'n a kalsan tak jersey number 10 chu a rochun ta bawk a ni.

Yamal hian Nilaini khan Barcelona-ah kum 2031 thleng daih contract thar a ziak a, kum 2008 atanga 2021 thlenga jersey no 10 hatu Lionel Messi chu Yamal hian a zah em em thu a sawi rualin, Messi-a hnung zui loin, ama kawng a zawh tur thu a sawi bawk.

"Ka contract thar atanga kan hmuh theih chu, Barcelona hi ka dam chhunga ka club a ni dawn tihna a ni. Ka hlim hle, pressure engmah tunah hian ka nei lo bawk. 

"Kan hlim tlang a, jersey number thar ka ha tawh dawn. Hetih lai hian ka thil tum erawh a danglam chuang lo.

"Ka tan chuan bung thar pawimawh tak a ni a, hlawhtlinna tam tak chan ka inbeisei a ni. Season hmasa ai khan, season thar hi ka phur a, ka nghakhlel em em a ni.

"Messi khan ama kawng a zawh a, kei pawhin keima kawng ka zawh dawn. Ansu-a number chu ka rochun ta a, ka theihna zawng zawng ka chhuah ang a, fans hlimna thlen ka tum dawn a ni.

"Sawiselna leh fakna chi hrang hrang ka dawng. Ka thian, chhung te leh ka laichin hnaite hnen atanga fakna leh sawiselna chiah ka ngaipawimawh. Tunah chuan football chauh ka ngaihtuah tawh a, hlim taka inkhelh ka tum a ni," tiin Yamal chuan contract thar a ziah hlimin a sawi.

Kum 2023 khan Yamal hian Barcelona tan a debut game a khel a, jersey number 41 a ha a, number 27 leh 19 te pawh a ha bawk.