Barcelona chuan nilaini hian Copa del Rey-ah Real Sociedad an hmachhawn dawn a, referee tur hi Barca tan hmel thar a ni lo. Xavi chuan quarter final-a Gil Manzano a referee tur chu buaina tham a nih loh thu a sawi.

Manzano hi Barca in LaLiga-a Osasuna an hmachhawn tuma Robert Lewandowski red card petu kha a ni a, khelmual a chhuahsan dawna a chetdan avangin Lewandowski chu match 3 chhung atan hrem a ni nghe nghe a nih kha.

"Buaina tham a tling lo, hriat loh der mai tur. Match thlamuang tak a nih kan beisei. Robert-a hi professional mahni game hrechiang a ni a, a inthunun thei.

"Referee chungchang theihnghilh turin palyer-te pawh ka hrilh fo. Kan thunun zawh loh dinhmun a nih pawhin kan mood a tichhe dawn chuang lo," tiin Xavi chuan reporter-te a hrilh.

Pathianni khan Getafe lakah si 1 faiin hnehna an chang a, tun season La Liga-a vawi 17 an feh chhuah tawhah Barca hian goal 6 chiah an la chhuah. Xavi chuan an goalkeeper Marc-Andre ter Stegan lakah lawmthu a sawi bawk.

"Marc hi a tha khawp mai, a lo luh tirh kha min hriat chhuahtir. Thil tam tak min tihsak a, danglamna tam tak a thlen bawk.

"Defensive line hi kan ngai pawimawh em em a, tun season atan bik phei hi chuan awmzia a nei hlein ka hria," tiin Xavi chuan a sawi bawk.

January transfer window tawp hmain hun tlemte chauh a awm tawh a, Loan-a Camp Nou chhuahsan tura rin kai Franck Kessie chu Xavi hian a chhuatir dawn lo niin a lang.

Milan midfielder hlui hian tun season La Liga-ah starting xi vawi 2 chiah a la chang a, mahse Copa del Rey-a Cueta an hmachhawn tum khan a che tha hle. Goal khungin vawi 2 a assist bawk.

"Kessie chhuahtir chungchang ka ngaihtuah lo hrim hrim, kan game-ah hian danglamna tam tak mi siamsak ve bawk. Team-ah hian ka lungawi,"tiin Xavi chuan a sawi bawk a ni.