12 Jul 2019 08:51

bakteaJr.

Mizo tlangval

​Barca-ah English rawlthar a lut

Barcelona chuan Championship club West Brom atangin English rawlthar duhawm tak kum 16 mi Louie Barry chu an lakluh thu an puang.

West Brom hian Barry-a manah hian pound 235,000 chauh an hmu nia tarlan a ni a, English striker Barry hian Barca-ah kum thum daih contract ziakin U19 team lamah a khel ang.

Barry hi English ni mahse Republic of Ireland citizenship a neih tho avangin youth team lamah Ireland tan a khelh tawh bakah England 16 tan game kua a khel tawh bawka, England tana khelh hi a thlang zawk.

Kum ruk mi chauh a nih lai atangin Barry hi West Brom-ah a awm tawh a, English naupang zinga beiseiawm ber zinga mi niin Barcelona bakah hian Paris Saint-Germain pawhin dawr mahse Barcelona hi a thlang ta zawk.

West Brom hotute hi Barcelona lakah an lungawi vak lo niin Sky Sports chuan a ziak a, engkim tih fel a nih hma in Barca hian Barry an lakluh thu an puan avangin West Brom lam hi an lungawi nia tarlan a ni.

Ningani khan Barcelona chuan Barry hi an lakluh thu an official website-ah an tarlang a, an jersey pawt parhin Barry-a thlalak hi an pholang.

Tun laiah English rawltharte an ‘luck’ chho hle a, ram pawnah English player naupang che tha tak tak an awm tak zeuh zeuh avangin Europe-a club liante chuan English rawlthar lakluh an intih hmuh chho viau pawh a tih theih awm e.