Brazilian footballer hlui Rivaldo chuan Brazilian forward Neymar-a’n Barcelona chhuahsana Paris Saint-Germain a zawm kha Neymar-a thil tihsual a nih thu leh Neymar chu Barca-a kir leh tura a duh thu a sawi.

Kum 27 mi Neymar hian kum 2013 khan Santos atangin Barcelona a zawm a, Barca-a ropui taka a khelh hnuah kum 2017 khan khawvela footballer manto ber ni turin PSG a zawm. PSG hian Neymar-a manah hian euro maktaduai 222 lai mai an senga, tun thlengin khawvela footballer manto ber a la ni chiang hle

Brazil leh Barcelona player hlui Rivaldo chuan, “Neymar hi Barcelona-ah kir leh se ka ti a, Barca leh Neymar-a tan a tha ve ve ang. Neymar-a’n Barcelona a chhuahsan kha a thil tihsual a ni a, amah emaw a pa in chu chu an sawi lo, mahse a tisual a ni.

“Barcelona-ah khan kum li emaw kum nga daih contract a la nei a, a chhuah kha a tul miah lo. Fan-te pawhin chhuak lo turin an duh a, mahse a kir leh a nih a, goal a khung leh a nih chuan a chhuak tih hi an theihnghilh sak ngei ang.

“Barcelona-ah a kir a, Champions League a lakpuia, Real Madrid a hneh pui bawk chuan chu chu supporter-te duh ber a ni a, an ngaina leh em em ngei ang. Kum 27 chauh a la ni a, hun a la ngahin, treble a la leh thei a nih chuan a ropui hle dawn a ni,” a ti.

Neymar hian PSG tan game 58 khel tawhin goal 51 a khung tawh a, trophy pali chawi tawh bawk mahse PSG-ah hian a inbengbel thei tak tak lo niin a langa, Barcelona nen sawizawm an ni nasa leh mek tawh hle a ni.