International Muay Thai instructor training turin Muay Thai Association of Mizoram chuan MSSC sponsor-na hnuaiah Samuel Lalrozama Hmar chu Thailand-ah training turin a tir a, tha takin training a zo.
Samuela hi kum 2015 khan Muay Thai rawn chhuahna hmun Thailand sawrkar pawmpuinain World body chuan Kru title (Professor) a lo hlan tawh a, tunah hian Thailand Education Ministry-in instructor training curriculum thar a siam hmanga seminar buatsaih chu a han chhim leh a ni.
He seminar hi April ni 1 atanga April ni 5, 2019 chhunga Bangkok-a Master Toddy’s Muay Thai Academy-ah neih a ni a; Australia, India, Mauritius, USA, Philippines, England leh China atangin training turin an kal khawm a. Mi 4 chu trainer certificate hlan an ni a, Samuela leh Australian instructor chu Kru certificate hlan an ni.
Instructor trainee-te hi class an laktir a, club hlawhltling taka kalpui dan tur business management class neihpui thin an ni bawk. A tawp ni-ah hian exam neih a ni a, Thailand sawrkar aiawh pakhat te pawhin an hman pui a, Professional referee C grade training leh exam neih niin tha takin Samuela hian a zo a ni.
Mizoram Muaythai Head Instructir Samuel Lalrozama'n training a neihna Master Toddy hi Thai-American martial artist a a ni a, a hming tak chu Thohsaphol Sitiwatjana a ni. American citizenship nei niin sulhnu a ngah hle a, lemchan khawvelah pawh hming chherin James Bond film pakat "The Man with the Golden Gun"-ahte pawh a chang a, Roger Moore-a training petu a ni.
Thailand lal pawhin MuayThai vanga chawimawina a lo hlan tawh a ni a, Muay Thai world champion mi 40 chuang a lo train chhuak tawh. Training hi zingah darkar 3 leh tlaiah darker 3 neih a ni thin a, naupang zirtir dan tur leh psychology bakah fighter train dan tur leh pad ken dan tur dik te zir thin a ni.
Samuel Lalrozama'n Mizoramah a thiamna thar zirchhuahte hlawk taka hman a nih theih nan Muaythai Association of Mizoram chuan kum danga a tih thin danin state level instructor course a buatsaih leh thuai dawn a, India rama state entawntlak leh thleng sang ber nih tumin MAM chuan hma lak nghal an tum mek a, Thailand-ah hian an instructor dangte pawh tirh zel an tum a ni.