Jose Mourinho chu a contract hman zawh hmaa a club enkawlin an ban avangin a hausak phah tawh hle a, hetiang vanga a sum hai luh tawh zawng zawng belh khawm chu £51 million a tling tawh a ni.
Portuguese coach Jose Mourinho leh a staff te chu Chelsea leh Manchester United chuan a contract tawp hmain an ban a, henga club lamin sum an pek tawh zawng zawng belh khawm hi £51 million zet a tling a, hetianga hun a hman chhung hi kum 12 vel chiah a ni.
Nilaithawhtan khan Manchester United chuan an sum dinhmun an puangzar a, hetah hian Mourinho an ban khan £15 million an pe niin an tarlang a, Mourinho staff panga te pawh nikum December thlaa an ban khan £4.6 million an pe niin an tarlang bawk.
Mourinho leh a pawlte chu 2007 khan Chelsea chuan contract an hman zawh hmain a vawi khatna atan an lo ban tawh a, hemi tum hian £23.1 million zet mai an dawng a. 2015 khan a vawi hnihna atan Stamford Bridge an chhuahsan a, hemi tum hi chuan tlemin an sum dawn hi a kiam ta deuh a, heti chung hian £8.3 million chu an dawng tling tho a ni.
Manchester United chuan Mourinho hi an chhawr ve leh a, nikum January thla khan contract a ziak thar a, 2020 thleng Old Trafford-a awm turin a contract-ah hian a ziak a. Heti chung hian United thuneitute beisei anga club a enkawl theih tak loh avangin nikum December thla khan an inzawmna hi an titawp ve leh a, hemi tuma United in sum an pek hi a vaiin £19.6 million a ni.
United a enkawl khan Mourinho chuan kum khatah £12 million a hlawh a, hei bakah hian sponsorship neuh neuhah £10 million bawr vel chu kum tin a hui tel bawk a. Nikuma Russia rama FIFA World Cup khelh a niih khan Russia Today channel chuan Mourinho hi ni 4 chhung chauh pundit atan an hmang a, £1.71 million an hlawhtir a, hei hi ni khata £430,000 hlawh ang a ni.
Russia Today channel bawk hian Mourinho hi Champions League chungchanga show an buatsaih turah an sawm leh bawk a, thla thar atangin he show hi an nei tan dawn a, an inbiak remna hi a tenau lo hle niin an sawi a, engzat chiahin nge an inbiak tih erawh sawi chian a ni lo thung.
Heng bakah hian beIN SPORTS in Mourinho hi pundit anga an rawihnaah £120,000 an pe bawk a, thla hmasa khan Premier League leh Asian Cup chungchang vel an tichhuak a ni.
Kum 56-a upa Mourinho hian tunah chuan hna bulfuk nei rih lo mahse sum chu a hai lut ve reng tho a, khawvel hmun hrang hrangah sum hnar chuan a um zel a tih theih a. Heineken, Hublot, Jaguar, BT Sport, Adidas, Atlantis Hotels, EA Sports leh Lipton Tea te nen pawh kum eng emaw zat chu an lo inzawm tawh a ni.
Jose Mourinho hi Heineken nen kum hnih chhung atang an inrem a, inremna an ziahah chuan Mourinho hian £4 million a hlawh thei a ni.