Season hmasa khan Luis Suarez-a'n La Liga-ah goal 40 zet a khung a, Lionel Messi leh Cristiano Ronaldo-te'n an tluk lo. Nimahsela Uruguayan striker hian Ballon d'Or award a dawn a rin loh thu a sawi.

Liverpool striker hlui hi tunlai striker tha ber tih ngam a ni a, ani aia striker tha sawi tur an awm lo tih theih a ni. Suarez erawh a tawng fimkhur a, Ballon d'Or chu sumdawnna nena inzawm a nih thu a sawi.

Kum 29-a upa Suarez chuan hemi chungchnag hi sawiin, "Ballon d'Or hi chu khelmual chhunga kan thil hlenchhuah aiin sumdawnna lam nen a inkungkaih zawkin ka hria. Ka lawmman dawn tawhte hi chu ka hlawhchhuah vek a ni a, Golden shoe hi goal khung hnem ber ka nih vang a ni a min chhuhsak ngaihna a awm lo.

"Ballon d'Or hi ka dawn ka ring lem lo. A chhan chu sumdawnna lam nen a inkungkaih a, helamah hian ka laktlak ve loh. Ka duh ber chu Champions League nomawi dang chawi leh a ni," tiin Ballon d'Or a dawn a rin loh thu a sawi.

Barcelona a pan hnuah Suarez a hlawhtling a, La Liga title pahnih bakah Champions League leh Copa del Rey title pakhat ve ve a chawi tawh bawk.