15 May 2019 05:23

inkhel

Ballon d’Or dawng turin Messi ka duh: Sergio Aguero

Sergio Aguero chuan Lionel Messi chu Ballon d’Or dawng leh tura a duh ber thu a sawi chhuak.

Manchester City striker Sergio Aguero chu media lamin an kawmnaah Ballon d’Or dawng leh tura a duh ber an zawt a. Zawhna hi chhangin Argentina star chuan Lionel Messi chu chawimawina sang dawng tura a duh ber thu a sawi a ni.

Vawi nga ngawt he chawimawina lo dawng tawh Lionel Messi chuan Barcelona chu UEFA Champions League final a luhpui thei ta lo a, hei vang hian Ballon d’Or dawn theih pawh a beiseiawm loh phah a. Media lamin Ballon d’Or dawngtu tur chu Champions League final lut ngei ni se an tih pawhin Aguero chuan Messi hi a thlang tho a ni.

Nikumah khan kum 31-a upa Messi chu Ballon d’Or dawngtu an puanin pangana a ni pha chauh a, kuminah a che chhe hran lo bawk a, Aguero pawhin a thianpa tluka Europe khawmualpuia mi mal chawimawina sang dawn phu an awm loh thu a sawi.

Aguero chuan, “Ka ngaihdan ka sawi chhuak a sawi fiah zui vak hi ka duh hran lo a. Ka thil sawi loh deuh min sawitir te a nih chuan thudik sawi chhuah ngei ngei a ngai thung a ni,” a ti.

“Zawhna leh sawi neuh neuh a tam bawk a, chiang lehzualin ka’n sawi ang e. Lionel Messi hian football a khelh chhung chu Ballon d’Or dawng thei tur hian ka thlang char char dawn a. Tun season chhunga a khelh dan anga a khel thei zel a nih phei chuan amah bak thlan chi a ni dawn lo hrim hrim,” a ti bawk.

A sawi zelnaah, “Mi thenkhat chuan kuminah he chawimawina sang hi dawn ka inrin leh inrin loh te min zawt nawlh nawlh bawk a. Chutianga min zawttute ka chhanna chu dawng duh niin, dawn inbeisei dawn ta ila, UEFA Champions League final ka luh hmasak phawt a ngai ang,” a ti.