12 Oct 2018 12:01

inkhel

Ballon d’Or dawng tura Salah duhtu an tam ber

Tun hnaia Ballon d’Or dawng tura an duh ber thlang tura he chawimawina pe tur te’n ngaihdan an laknaah kum 10 chhung zet ro lo rel tawh Lionel Messi leh Cristiano Ronaldo te chu Mohamed Salah chuan a khum a, Salah duhtu hi an tam fal hle.

Mohamed Salah chuan Liverpool a zawm tirh season-ah boruak a nei lian nghal hle a, goal a thun thei em em a, Premier League bikah goal 32 ngawt mai a thun tling nghal a, season tawpah PFA Player of the Year atan an thlang hial a ni.

Egyptian striker Salah hian Harry Kane chu khumin Premier League Golden Boot a dawng a, BBC African Player of the Year atan an thlan bakah PFA Team of the Year-ah pawh a lang a. Liverpool Fans Player of the Year a nih bakah Premier League Player of the Season a ni bawk a. Hei vang hian France Football official website lamah pawh vote hi a hmu sang fal hle.

France Football in ngaihdan an lakah hian Mohamed Salah chuan vote tla zawng zawng atanga 53% ngawt mai a hmu a, Barcelona leh Argentina superstar Lionel Messi chu a dawt chiahah awmin 28% a hmu bawk a. UEFA Player of the Year chawimawina dawngtu Luka Modric chuan vote 2% chauh a hmu a, UEFA Champions League-a a zawna vawi thum Real Madrid champion pui thei Cristiano Ronaldo chuan vote 5% chauh a hmu bawk.

Russia rama FIFA World Cup final-a Croatia hruai thleng thei Luka Modric chu kumin hian Ballon d’Or dawng thei tura rin kai ber a ni chho mek a, Lionel Messi leh Cristiano Ronaldo te kal tluang lai chu a tihtawp an ring hlawm hle a. Mahse, European Golden Boot dawngtu leh Barcelona chu La Liga leh Copa del Rey title lakpui thei Messi pawh a chungnung leh lo ang tih a sawi theih loh a ni.

Salah, Messi, Ronaldo leh Modric te bakah hian Real Madrid defender Raphael Varane, Paris Saint-Germain forward Kylian Mbappe, Atletico Madrid star Antoine Griezmann te chu he chawimawina dawng thei tura rin kai pawl an ni bawk a ni.