Virgil van Dijk chuan kumina Ballon d’Or chawimawina dawng thei tura an thlang chhuak ve chu ropui a tih thu sawiin, chawimawina dawng ang tluka a inngaih tawh thu a sawi.
Kuminah hian Lionel Messi chu Ballon d’Or dawng tura rin kai deuh ber a ni a, hetih rual hian Netherlands defender Virgil van Dijk chu mi tam tak chuan he chawimawina ropui dawng tur hian an ring viau bawk a ni.
Van Dijk hian Liverpool chu season hmasaah khan UEFA Champions League title a lakpui a, Premier League lamah pawh an che tha hle a, pahnihna niin, champion Manchester City chu point 1 chiahin an um pha lo a ni.
Liverpool defender Van Dijk hi UEFA Player of the Year atan an thlang a, September thlaah khan FIFA World Player of the Year thlannaah Lionel Messi a tluk ta lo a, pahnihna a ni thei bawk a ni.
Kum 28-a upa Van Dijk chuan, “Ballon d’Or dawng thei tura an thlan chhuah zinga ka tel ve thei hrim hrim hi a ropui ka ti tawh a. Season liam taah team tana tha ka thawh ve avanga hetiang dinhmuna ka ding hi lawmawm ka ti hle a ni,” a ti.
“Zaninah hian tu pawh kan che tha nghal vek a, tumah hian hloh kan nei lo sa a ni ber a. Hetiang chawimawina sang dawng thei tura min thlang chhuak hi chawimawina dawng ang tluk a ni tawh hrim hrim a ni,” a ti bawk.
A sawi zelnaah, “Chawimawina an sem hunah chuan a dawngtu a awm ngei dawn a, dawng ve ta lo pawh chhuanawm tak tak vek an ni hlawm dawn a. Zaninah chuan eng thil nge thleng dawn lo ngaichang zel phawt ang,” a ti.
Kumin October thlaah khan Ballon d’Or dawng thei tur mipa 30 hming chu an puangzar a. Virgil van Dijk chu Liverpool player pasarih zinga pakhat niin, goalkeeper Alisson Becker, defender Trent Alexander-Arnold, midfielder Georginio Wijnaldum leh forward pathum Mohamed Salah, Sadio Mane leh Roberto Firmino te chu an thlang tel a ni.
Manchester City player panga Sergio Aguero, Bernardo Silva, Kevin De Bruyne, Raheem Sterling leh Riyad Mahrez te bakah Tottenham Hotspur player pahnih Hugo Lloris leh Son Heung-min te an thlang tel bawk a.
Arsenal striker Pierre-Emerick Aubameyang bakah Real Madrid winger Eden Hazard leh Juventus forward Cristiano Ronaldo te pawh he chawimawina sang dawng thei tura thlan chhuah zingah hian an tel hlawm a ni.