Kylian Mbappe chuan Ballon d’Or dawn chu thil chakawm tak a nih rualin, chutiang turin a ngaihtuahna a seng vak ngai lo tih a sawi.

Paris Saint-Germain star Kylian Mbappe chu kum 21-a upa chauh la ni mah se tun hnaiah a vul chho hle a, mi tam tak chuan khawvela footballer ropui ber pawl niin an ngai der tawh a ni.

Mbappe chu club tan leh ram tan a che tha thei bawk a, engtikah emaw tak chuan mi mal chawimawina sang Ballon d’Or chu la dawng ngei tura ngaih a ni a. 2008 atang khan Lionel Messi leh Cristiano Ronaldo te chuan he chawimawina sang hi an indawn chhawk deuh ngar ngar a, an pahnih hian vawi 11 ngawt mai an dawng tawh a ni.

Hetiang taka chawimawina ropui dawn chu Kylian Mbappe pawhin thil chakawm tak a nih thu sawiin, chawimawina dawn tuma thil a tih ngai loh thu erawh sawiin, thil hmanhmawhthlak nia a ngaih loh thu a sawi chhuak.

“Ballon d’Or ka dawng thei a nih chuan a lawmawm khawp ang a, chutih rualin zanah muhil thei lo khawpa ngaihtuah chi chu a ni lem lo,” tiin Mbappe chuan a sawi.

“He chawimawina dawng thei nih hi a ropuiin a hlu a, kei erawh chuan season tharah emaw, chumi dawt lehah emaw pawh ka dawn ka la ring lo a. Hun tiam bik a awm chuang lo a, hmanhmawh vak chi niin ka ngai lo,” a ti bawk.

A sawi zelnaah, “Thil dang zawng aiin PSG leh France team te hi ka dah pawimawh hmasa ber a. Team tan theihtawp ka chhuah zel ang a, mi mal chawimawina ka lo dawng ta a nih leh a lawmawm hle a ni mai,” a ti.

Kum 21-a upa chauh a la ni chungin Mbappe chuan Ligue 1 title vawi 4 a lak tawh bakah FIFA World Cup trophy pawh a la tawh a. Heng bakah hian trophy neuh neuh leh chawimawina eng eng emaw chu a lo dawng nual tawh bawk a ni.