Kum 2018 Ballon d’Or sem a ni a, Luka Modric chu he lawmman hlu tak hi hlan niin, Cristiano Ronaldo chuan dawtin Antoine Griezmann chu pathumna a ni bawk.

Ballon d’Or 2018-ah hian French forward kum 19 mi chu palina ni bawkin, Ballon d’Or vawi nga lo dawng tawh; mi tam takin footballer piang tawh zawng zawnga thiam ber an ngaih Lionel Messi chu panganaah a awm thung.

Kum 2006 hnuah Messi chu top 3-ah a awm pha lova, Barcelona manager Ernesto Valverde chuan hei hi a awm ang lo hle niin a sawi. Valverde chuan, “Modric hian Ballon d’Or lawmman a lak avang hian kan lawmpui em em a, mahse Messi panganaa a awm daih erawh a awm ang lo hle. He lawmman kalhmang erawh sawithui ka duh lo,” a ti.

Kum 31 mi Messi hian season liamta khan Barcelona chu La Liga-ah champion puiin, goal 34 a khunga, La Liga bakah hian Barcelona chuan Copa del Rey an chawi bawk.

Messi hian Ballon d’Or dawng tur thlannaah hian point 280 a hmu a, lawmman dawngtu Modric chuan point 753 a a hmu thung. Ballon d’Or vawi nga la tawh dang Ronaldo chuan point 476 a hmu a, Greizmann chuan point 414 hmuin Mbappe chuan point 347 a hmu bawk a ni.