The Best FIFA Men’s Player-a thlan Robert Lewandowski chuan FIFA Best Player lawmman chu Ballon d’Or aia a ngaihhlut zawk thu a sawi.
Bayern Munich leh Poland striker Lewandowski hian FIFA Best Player lawmman hi kum 2020 pawh khan a lo dawng tawh a, a kum zawnin a dawng a, Ballon d’Or erawh a la dawng lova, nikum khan Ballon d’Or Stiker of the Year lawmman pek a ni.
Kum 33 mi Lewandowski hian football-a mimal chawimawina ropui tak tak a dawng kim tawh viau a, mahse mimal lawmmana ngaihhut ber Ballon d’Or lawmman erawh a la dawng lo.
Lewandowski chuan, “FIFA award leh Ballon d’Or chungchang hi tun hnaiah ka ngaihtuah nasa a, FIFA award hi Ballon d’Or aiin ka ngaihlu tawh zawk a ni. Ballon d’Or lawmman thlangtu te hi chanchinbu mi (journalist) chauh an ni a, footballer hlui te leh la khel mek te bakah expert te pawhin an sawi fo angin hriatchianna tak tak a awm lo.
“FIFA award erawh professional te leh chanchinbu miten an thlang a, team captain hrang hrang leh coach hrang hrang te thlan a ni a, anni hi chuan kan sulhnu an chhui a, kan thil paltlang hi an tawn ve avangin ril takin an rawn hrethiam.
“Ballon d’Or hi FIFA Footballer of the Year aiin ngaih ropui zawk chu a ni maithei a, mahse coach leh player te’n an thlan atanga a kum zawna best footballer-a thlan ka ni thei hi a chhuanawm ka ti takzet zet a, a chhan chu kum tam tak chhung ka thawhrimzia ka inhria a ni,” a ti.
FIFA Best Player lawmman hi khawvela football thuneitu sang ber FIFA in a pek a ni a, chanchinbu mi thenkhat bakah national team coach leh national team captain te thlan a ni. A hma chuan FIFA World Player of the Year tih thin a ni a, kum 2010 khan FIFA leh France Football te chu kum ruk chhung atan inremin, Ballon d’Or nen thlun zawm a ni a, FIFA Ballon d’Or angin kum 2016 thleng khan kalpui a ni.
Ballon d’Or erawh French news magazine France Football-in kum tina an thlan a ni a, France Football hian Ballon d’Or dawng thei tur player 30 an chhawpchhuak thin a, hemi atang hian khawvel hmun hrang hranga chanchinbu miten lawmman dawng tur hi an thlang chhuak ta thin a ni.