Naupang football khel thin zinga kum 12 aia la naupang chu an lua ball tauh an phalsak lo a, hetianga tih hian thluak a tibuai thei niin an sawi.

Tun hnaiah khan England, Northern Ireland leh Scotland velah chuan naupang kum 12 aia naupang tan ball tauh (head) an pha lo a. Hetianga ball tauh hian thluak a tidanglam thei niin mi thiamte chuan an sawi a, a rei deuh hnuah harsatna a siam thei niin an sawi a ni.

Mi thiamte chuan tun hnaiah khan hemi chungchang hi an zir chiang a, football khel thinte chu an kum a tam deuh hnuah thluak tha lo natna eng eng emaw avangin an thi duh bik niin an sawi a. Football khel ngai lo aiin football khel thinte chu an upat hnuah thluak lam fel lohna avang hian a let thum leh a chanve velin an thi duh bik niin an sawi chhuak.

Football tauh chu thluak tan a tha lo nia an sawi hnuah hian U12 hnuailam chin tan chuan training neihna velah pawh ball tauh hi an phal zui tawh lo a, primary school naupangte tan ball tauh hi an phal lo vek mai a. Inkhelh lai erawh chuan a khap theih tak tak loh avangin tih vak ngaihna erawh a awm dawn lo thung.

An zir chiannaah hian football tauh chu thluak tan a pawi thei tih an zir rualin, thluak lam fel lohna thlentu bulpui chu football tauh hi a ni tih erawh chiang takin an finfiah lem lo niin an sawi.

Hetianga ball tauh hlauhawmzia lo aupui tawh thin Dawn Astle chu he thutluknaah hian a lawm hle a, senior player lampangah pawh ball tauh chu uar loh ni se tiin a duh dan a lo sawi ve bawk a ni.

Dawn Astle-i pa Jeff chu football khel thin niin, 2002 kumah khan thluak lam fel lo vangin a thi tawh a. Hetiang thil te an chhungkuaa an tawn ve bawk avang hian Dawn chuan football tauh chu a duh lo hle a ni.

FA chief executive Mark Bullingham chuan, “Ball tauh chungchanga an thil zir chhuah thar hi kan inkaihhruai mek dan nen pawh a la inzul vek a. Coach leh zirtirtute chuan tlema kum naupang deuh zinga ball tauh tihtlem kawngah hma an la chho zel turah kan ngai,” a ti.

“Tlema kum naupang zawkte inkhelah hian ball chu an tauh khat hle niin kan hria a, hei vang hian hetiang kawnga fimkhur pawh a harsa lo turah kan ngai a. Naupangin football khelh zir nuam an tihna pawh he thil hian a tibuai lo turah chuan kan ngai a ni,” a ti bawk.