NBA huanga player hrang hrang zingah mi dangte aia langsar bik hi an awm thin a, mipui hip bik riau te, mi mit la zual bik te an awm thin. Chutiang zingah chuan Kyrie Irving leh Allen Iverson te pawh an tel a, anni pahnih karah hian ball khawih thiam zawk thlan thiam pawh a har hle.
Philadelphia 76ers chuan 1996 ah khan Allen Iverson an la lut a, Kobe Bryant, Steve Nash leh Ray Allen te an nei tel bawk a, player an nei tha hlawm hle a, a ruala player tha an kawl hnem ber lai niin an sawi hial a ni.
76ers a zawm kumah Iverson chu a che tha nghal viau mai a, game tina point 23.5, assist 7.5, rebound 4.1 leh steal 2.1 nei ziah ang vel a ni a. Hetiang ai maha mi mit a lakna chu ball khawih lamah a ni a, ball khawih a thiam em avangin hriat a hlawh phah viau a. He mi kumah hian Iverson chu Rookie of the Year atan an thlang a, All-NBA Rookie first team ah pawh an thlang tel a ni.
2000-01 season-ah khan Iverson chuan NBA Finals a thleng a, he mi kumah hian league MVP atan an thlang nghe nghe a. 2000-01 playoff ah a che tha em em a, a zarah 76ers chuan NBA Finals an luh theih phah a, Kobe Bryant leh Shaqquille O’Neal te telna, champion lai LA Lakers an hmachhawn a ni.
NBA huangah season 14 hun a hmang hman a, he mi chhung hian Allen Iverson chu player ngaihsan hlawh berte zinga mi a ni hman a, sulhnu duhawm tak tak pawh a hnutchhiah nual bawk a. Vawi thum chu All-NBA first team-ah a tel a, steal lamah vawi 4 chu a chungnung ber a ni thei a, NBA All-Star MVP pawh vawi hnih chu a ni a, Olympic bronze medal pawh a la bawk a ni.
2016 kumah khan Hall of Fame chuan Allen Iverson chu a vanglaia a hlawhtlinna te, a danglamna te an hriatpui nghe nghe a ni.
Kyrie Irving chu 2011 NBA Draft ah khan Cleveland Cavaliers chuan an thlang a, NBA huanga season a hman hmasak berah hian a che tha nghal hle a, game tinah 3-point line atanga shot 39.9% nei, field shot 46.9%, rebound 3.7 leh assist 4.7 nei anga chhut a ni.
2012 kumah khan Kyrie Irving chu Rookie of the Year atan an thlang a, All-NBA first team-ah pawh an thlang tel bawk a. He mi kumah hian New Jersey lakah point 32 a thun a, heng zinga point 21 hi fourth quarter chhunga a thun niin, he mi season chhunga game khata a score hnem ber a ni.
2014-15 kumah khan LeBron James chu Cleveland-ah a kir leh a, All-Star Kevin Love an la lut bawk a, Kyrie te nen hian an inkawp chho a, NBA championship title la thei khawpin an inkawp fuh hlawm a ni.
Vawi 7 ngawt NBA All-Star ni thei hian NBA Finals vawi thum a lut thei a, 2016 kumah khan Kyrie Irving chuan Cleveland Cavaliers chu NBA championship title a lakpui a, he mi tumah hian title la thei turin regular-season team ropui ber tia sawi thin Golden State Warriors an hneh a ni.
Season 10 chhung chu Kyrie Irving hian NBA huangah hun a hmang a, he mi hun chhung hian chawimawina chi hrang hrang a dawng nual hman a. NBA All-Star MVP a ni hman a, vawi hnih chu All-NBA second team-ah a tel a, All-NBA third team-ah pawh vawi khat chu a tel bawk a. 3-point contest ah chak ber a nih tawh bakah Olympic gold medal pawh a dawng tawh a ni.