Premier League inkhelah Manchester United chuan Southamton tlawhin, team hnihte chu 2-2 in an inhnehtawk a, United chuan 20mins a ralin si hnih an chhuaha, an chak lo zui mai dawn emaw tih hnuah an si phurh an sut ve ve.

Inkhel zawhah United manager Jose Mourinho chuan ball an hloh nasat thu sawiin, “Ball kan hloh nasa em em a, a bikin midfield-ah ball kan hloh nasa hle. First half tawp lam minute sawmhnih chhung vel kha kan khel tha em em a, mahse secon half-ah a ngai bawkah letin, ball kan hloh leh mawlh mawlh a ni.

“Ka player-te hian ho te in a khelh that theih tih hi an hre lova, harsa deuh deuha in pass kher an tum thin. Ka player-teah hian ball chuh duh tak tak an tam lova, kan tactic vanga chak lo kan ni lo. Mahse chak duhna thinlung nei tak takte pawh an awma, Phil Jones leh Marcus Rashford-te ang kha an ni.

“Kan hmatawng player pahnih khan duh angin ball an hmu tam lova, tanpuitu pawh an nei tha lo hle, a chhan chu ball kan hloh nasa em a ni. Midfield-ah hian khirh tak taka in pass lovin, pangai takin; one touch pass kan khelh a ngai a, chu chuan kan hmatawng player-te a pui hle dawn a ni,” a ti.

Southampton lakah Mourinho hian defender panga hmangin centre back pathum a daha, centre back pangai chu Phil Jones bak a khel lo. Jones-a dinpui tur hian Mourinho chuan a centre back dangte chhawr tur a nei lova, defensive midfielder pahnih Scott McTominay leh Nemanja Matic-te chu Jones-a bulah a dah.

Matic leh McTominay-te chu centre back-a a khelh tir chungchang sawiin Mourinho chuan, “Centre back pangai pakhat chiah ka nei. Nemanja Vidic neih ka duh a mahse Nemanja Vidic a awm lo, Nemanja Matic chiah a awm a, midfielder a ni. Smalling chuan a ke ah hliam a nei a, a khel thei lo. Eric Bailly pawhin a hnung a ti na a, a khel thei chuang lo.

“Rojo chuan nimin khan training zawm mahse hun rei tak hnuah a vawikhatna a ni a, inkhel turin a la inpeih lova, mahse mamawh hunah chuan a inpeih reng. Lindelof pawhin hliam a nei. Kan centre back neih chhun chu Phil Jones chiah kha a ni,” a ti.