Qatar World Cup Group B inkhelah zirtawpni khan Wales leh Iran inhmachhawnin 2-0 in Iran an chak. Wales captain Gareth Bale chuan knockout stage inhlankai chu a harsat tur thu a sawi.
Robert Page-a pawlte hian game hnih an khelh tawhah point 1 chiah la hlawhchhuakin hun tha nei tur chuan England an hneh ngei ngei a ngai.
Roozbeh Cheshmi leh Ramin Rezaeian chuan Iran tan chakna goal an khung a. Wales keeper Wayne Hennessey chu game atanga hnawhchhuah a ni bawk.
Inkhelh zawhah Bale chuan,"A lungawithlak loh tih bak sawi ngaihna ka hre lo," tiin a sawi nghe nghe
Wales manager Page chuan a pawlte inkhel chu, "Kan inbuatsaihna a tluk lo lutuk. Chawlh kan ngah lutuk chuan rah chhuah pakhat chiah a awm thin. Mahse England hmachhawn tur chuan kan inpeih ang," tiin a sawi.
England-in hneh taka 6-2 a an sawp hnua dinhmun rawn siam tha leh Iran lakah hian Bale pawhin tih theih a nei tam lo hle. Wales hmatawng Bale hian vawi 36 chauh ball changin vawi 1 chiah shot-na hun a nei. BBC Sport's player dinhmun peknaah Gareth Bale chuan performance-ah 2.56 chauh hmuin a mawng berah a awm. A team-mate Aaron Ramsey chuan 2.63 hmuin a chung lawkah a awm bawk.
"A tawp thlengin theihtawp chhuah mah ila mi 10 chauh niha team tha tak hmachhawn kha chu thil hautak tak a ni. Intuai thara hmalam kan pan ve zel a ngai, harsa tawh dawn mah se England hi hneh ngei kan tum ang," tiin Bale chuan a sawi.
BBC pundit-te leh Wales defender lo ni tawh thin James Collins pawhin Bale khelh dan chu an beisei ang a nih loh thu an sawi ve bawk. Wales game hmasa berah pawh goal khung mah se penalty atangin a khung a nih kha.
Wales hi he kum 33-a upa chungah hian an innghat lutuk mah mah em ni aw? tih theih a ni a. Collins chuan, "Kan dinhmun siamtha turin Bale chungah hian kan innghat thei tawh lo ang. A khelh dan thin level ang khan a khel tawh lo tih amah pawhin a inhria a, chu aia sang chu keini'n kan beisei bawk si," tiin BBC Radio 5 live-ah a sawi.
Scotland winger lo ni tawh thin Pat Nevin pawhin, "A hming hi Gareth Bale ni lo se chu game atanga lakchhuah a nihna a rei tawh ang, a hnu zelah pawh a khel tawh lo ang. Hmana Bale kan hriat thin kha a ang tawh lo," tiin a sawi.
Wales hian November ni 30-ah England an hmachhawn ang, England leh USA te an lo inhnehtawk bawk nen, Wales tan chuan chance chu a la awm, Wales hian England hneh pawh ni se goal difference-a midang aia an that a ngai dawn bawk a ni.