Zinedine Zidane chuan Gareth Bale chu Real Madrid atanga a chhuah vat an beisei thu a sawi chhuak.
Gareth Bale chu Spanish club lianah hian a tla na tawh lo viau a, Real Madrid chuan chhuak tura an duh em em laiin Welsh winger lei ngam tur club hi an awm chiah lo thung a. Hetianga dinhmun laklawh deuha a awm mek lai hian Zidane chuan chhuak vat tura an beisei thu a sawi zui a ni.
Inrinni khan International Champions Cup-ah Real Madrid leh Bayern Munich te chu an inkhel a. He inkhelah hian Bayern Munich chu 3-1 ngawtin an chak a, Gareth Bale chu Zidane chuan a khelhtir ve lo a, inkhelh zawhah a khelhtir loh chhan pawh a sawi chhuak zui nghe nghe a ni.
Zidane chuan, “Gareth Bale kha ka khelhtir ve lo a, ka khelhtir loh chhan pawh a chhuah teuh tawh em vang a ni a. A chhuah theih vat hi kan beisei hle a, amah leh midang zawngte tan pawh a tha ber a. Team dang nen a chhuah theih dan tur hi kan buaipui mek a ni,” a ti.
“Bale hi a mimal tak chuan ngainat lohna emaw, ngaihtheih lohna emaw ka nei hran lo a. Amaherawhchu, thil tih tur tul a awm a, chutiang tih hun chu a inher chhuak a, tih tur tul cuh ka ti dawn a ni mai a. Thutlukna ka siam a ngai a, kan inthlak danglam a ngai a ni,” a ti bawk.
A sawi zelnaah, “Tun atanga rei vak loah kan inthlak danglam dawn a, darkar 24 a ni dawn nge, darkar 48 kan la nghak dawn tih erawh ka sawi thei lo a. Mahse, thil danglam chu a thleng ngei dawn a, kan zavaia tana tha tur a ni tih ka hria,” a ti.
Tun hnaiah Spain rama chanchinbu lar Marca chuan phek hmaah Tottenham Hotspur chu Bale la let leh tur hian an inhawng niin an tarlang a. Bernabeu a chhuahsan a nih chuan a club hluite hian kawng lo hawn an hreh lo niin an tarlang.
Marca hian Bale manah hian Real Madrid chu €50 million emaw, €60 million vel bawrah an lungawi thei dawn niin an tarlang a. Tottenham a pan a nih chuan Spurs hian kum khatah Bale chu €17 million an hlawhtir ang a, Real Madrid pawhin contract a hman zawh hmaa an hralh avangin zangnadawmna atan a tirah €25 million pek an tum niin an tarlang bawk.
Gareth Bale hian Real Madrid ah hian 2022 thleng contract a nei a. Season liam taah khan Welsh forward hian Los Blancos tan game 42 a khel a, hengah hian vawi 21 chu bul a tan a. Season li chhungin Bale hian La Liga game 151 khelh theihna turah a inhliam ngun em avangin game 79 chauh a khel a ni.