Denmark leh Tottenham player pawimawh Christian Eriksen chuan Wales leh Real Madrid player Gareth Bale chu Lionel Messi leh Cristiano Ronaldo tluk teuh ber zinga mi a nih thu a sawi.

Zirtawpni hian Denmark leh Wales-te chu UEFA Nations League-ah an inhmachhawn dawn a, a chak zawk zawk hi group-ah pakhatna an ni dawn. September thla khan Denmark hian Wales hi si hnih faiin an lo hneh tawha, Demark tana goal lutte hi Eriksen-a thun a ni nghe nghe.

Eriksen chuan Wales thiampuipa Bale-a chungchang sawiin, “Bale hi player tha tak a ni a, Messi leh Ronaldo nen pawh tehkhin a ni fo. Mahse tumah hi Messi leh Ronaldo ang em chu an ni lova, Bale hian anni pahnih hi a hnaih hle a ni.

“Real Madrid-ah hun eng emaw chen a awm tawh a, a khel tha thin hle bawk. Messi leh Ronaldo-te nena tehkhin a nih thin atang hian eng anga tha nge a nih chu a hriat mai. Bale hi chu mi tih bak ti thei a ni a, eng team tan pawh khel se thil danglam a ti thei. A che rang em em a, a khelh tawh hi chuan goal thun tura dah mai a awl hle. International football-ah hi chuan goal thun a pawimawh zual em em a, Bale hian chumi kawngah chuan a thawhhlawk hle bawk,” a ti.

Bale that zia hi mizo zingah pawh sawi tam a ngai lova, Ronaldo man khuma a hunlaia footballer manto ber ni thei hi a theuneu lo tih a chiang hle. Wales innghahna ber pakhat a ni a, Demark lakah pawh a chet that leh chet that lovin kawng ro a su thui leh hle in a rinawm a ni.