15 Mar 2019 12:08

inkhel

​Bale-a’n Real Madrid-ah a hun hmang zo duh

Real Madrid player Gareth Bale chuan Real Madrid-ah a career a hmang zo duh niin a agent Jonathan Barnett chuan a sawi.

Bale hi season liamta khan manager Zinedine Zidane chuan a chhawr tam loh em vangin nikum nipui lai khan chhuak tur anga sawi a ni a, mahse Zidane a ban leh takah chuan Bale hi Santiago Bernabeu-ah a cham chhunzawm.

Zidane-a ban hnuah Real Madrid an che tha thei lova, manager vawihnih an ban hnuah Real hian Zidane bawk an ruai leha, hemi a nih avang hian Bale hi tun nipuia chhuak ngei tur anga ngaih a ni mek.

Kum 29 mi Bale hian tun hma a pha lo sawt hle a, Real supporter lam pawhin an lo ‘boo’ khum tawh nghe nghe. Mahse Barnett chuan Bale hi a hlim niin a sawi a, Real a chhuahsan a duh lo niin a sawi bawk.

Barnett chuan Bale chu Real-a a cham zel dawn leh cham zel dawn loh chungchangah zawhna chhangin, “Cham zel dawn lawm ni, a career pum hi Real Madrid-a hman zawh a duh. Mahse tum anga thil a kal thei lo a nih chuan kan inbe leh ang chu. Zidane nen an inkawm anga, season tawpah kan hre zel ang,” a ti.

Bale a chungchang sawi chhunzawm zelin Barnett chuan, “Bale nen hian kan inbe fova, ka fapa Joshua nen an innel em em bawk a, Bale pawh hian a duat hle. Zidane-a khelh duhdan leh Bale-a khelh duhdan kha a inang lova, chu chu an inkar fuh loh chhan ber niin, hun a liam zel khan zual lam a pan.

“Bale hi a duhdana khelh tir a nih a, a inkhelh tam phawt chuan Cristiano Ronaldo-te huanga awm thei a ni a, player tha tak a la ni reng. Bale hi a tum a ruh a, chanchinbu mite thil sawiah beng a khawn lo. Mipuiin an auh nawmnah pawh khan engah mah a ngai lova, a thil tih turah a chiang a ni,” a ti bawk.