Nizan khan Real Sociedad lenchilhin Real Madrid chuan 2016/17 La Liga season an kick off a, Real Madrid hian si thum faiin mual neitu an hneh. Real Madrid tan hian Bale chuan goal hnih khungin Asensio chuan cool takin goal khat a khung bawk.

Cristiano Ronaldo chuan khup hliam a neih avangin training a zawm tlai a, full training chu zawm tawh mahse season tanna match-ah erawh a inlan ve thei lo. Tun kar tawp lamah erawh Real Madrid tan a inlan thei tawh dawn nia ngaih a ni.

Ronaldo tello pawhin Bale a che tha thova, tan atanga second 72-na lekah Gareth Bale hian Daniel Carvajal cross tha zet chu a tauh goal a, si khat faiin Real Madrid chuan hma an hruai.

First half tawp dawn minute 5 la awmin Raphael Varane siam tha zet chu Marco Asensio chuan cool takin a khung a, half time a nih chuan si hnih faiin Real Madrid chuan hma an hruai.

Second half-ah goal a lut lawk lo, first half tan tira goal khungtu Bale chuan goal hnuhnung ber a khung leh a, James Rodríguez pass tha tak chu Bale chuan umin; goalkeeper a bum hnuah awlsam takin a pet goal a, si thum faiin Real Madrid chuan hnehna an chang a ni.

Madrid khaw club Atletico Madrid erawh an chak zo lova, Estadio Vicente Calderon-ah Alaves mikhualin 1-1 in an inhnehtawkpui a, Goal hnihte hi hun tawp dawna lut ve ve niin, 90 mins ah Kevin Gameiro chuan Atletico Madrid tan goal khungin, he goal hi a hnu lawkah Manu Garcia chuan Alaves tan a rul a, 1-1 in an inhnehtawk ta a ni.

Inrinni zan khan Barcelona chuan Neymar tel lovin 6-2 laiin Real Betis an sawp a, Barca tan Suarez chuan hattrick a siam a, Messi chuan goal hnih khungin Turan chuan goal khat a khung bawk.

LaLiga Santander Results :

Malaga 1 - 1 Osasuna

Deportivo La Coruna 2 - 1 Eibar

Barcelona 6 - 2 Real Betis

Granada 1 - 1 Villarreal

Sevilla 6 - 4 Espanyol

Sporting Gijon 2 - 1 Athletic Bilbao

Real Sociedad 0 - 3 Real Madrid

Atletico Madrid 1 - 1 Alaves