Mercedes driver Nico Rosberg chu Bahrain Grand Prix-ah pakhatna niin Ferrari driver Kimi Raikkonen chu pahnihna a ni a, World Champion ni lai Lewis Hamilton chu pathumna a ni.
Rosberg hian kumin bul a tan tha hle a, Australian GP-ah pakhatna a nih hnuah Bahrain GP-ah pakhatna a ni chhunzawm zat a. Season hmasa nena chhiar zawmin a zawnin vawi 5 ngawt pakhatna a ni ta a ni.
Pole atanga bul tan Hamilton a tlanchhuak tha tawk lova, kual hmasa berah Bottas chuan a tai vir nawk a, pasarihnaah a tla thla dawrh a. Bottas hi penalty pek a ni nghe nghe. Pasarihna atangin Hamilton chuan pathumna dinhmun a rawn hauh leh theih a ni.
Qualifying-a che buai Ferrari driver Sebastian Vettel chu Engine failure vangin a chawl a, Jenson Button pawh a tlanchuak zo lo. Hetih lai Stoffel Vandoorne erawh a debut-ah McLaren tan a tlan tha hle a, 10-naah a thleng hial. Australian GP -a chesual Fernando Alonso chu medical a paltlang zawh loh avangin test driver Stoffel Vandoorne chuan a ai a awh a, a zahpuiawm loh hle nghe nghe a ni.
"F1 ka tlan hmasak ber a ni a, ka hlim hle a ni. Kar tir atang khan ka hahdam em em a, tihsual neih ka tum lo hrim hrim. Point khat hlawhchhuah hi a hlu a, beisei nei miah lovin ka tlan a, point khat ka hlawhchhuak hi a ropui tak zet a ni," tiin Vandoorne chuan Skysports a hrilh.
Harsatna nei lem lovin Rosberg chu pakhatna a ni a, +10.3s in Raikkonen chuan a thlau a, Lewis Hamilton phei chuan +30.1s laiin Rosberg hi a thlau a, Rosberg hian 1:34.482-ah lap khat a tlanchhuak hman a, hei hi lap record a ni nghe nghe.
"Pen khat te tein ka pen chho a, season tira vawi hnih pakhatna nih hi a hlu hle mai. Kan tlan leh turah ka rilru ka pe lehnghal a ni," tiin pakhatna Rosberg chuan a sawi.
Red Bull driver Daniel Ricciardo chu palina niin Haas an tlan thei chhunzawm zel a, Romain Grosjean chu pangana a ni a, Verstappen chu parukna a ni bawk a ni.
Bahrain GP result
1. Nico Rosberg, Mercedes, 57 laps
2. Kimi Raikkonen, Ferrari, +10.3s
3. Lewis Hamilton, Mercedes, +30.1s
4. Daniel Ricciardo, Red Bull, +62.5s
5. Romain Grosjean, Haas, +78.3s
6. Max Verstappen, Toro Rosso, +80.9s
7. Daniil Kvyat, Red Bull, +1 lap
8. Felipe Massa, Williams, +1 lap
9. Valtteri Bottas, Williams, +1 lap
10. Stoffel Vandoorne, McLaren, +1 lap
11. Kevin Magnussen, Renault, +1 lap
12. Marcus Ericsson, Sauber, +1 lap
13. Pascal Wehrlein, Manor, +1 lap
14. Felipe Nasr, Sauber, +1 lap
15. Nico Hulkenberg, Force India, +1 lap
16. Sergio Perez, Force India, +1 lap
17. Rio Haryanto, Manor, +1 lap
DNF Carlos Sainz, Toro Rosso
DNF Esteban Gutierrez, Haas
DNF Jenson Button, McLaren
DNS Sebastian Vettel, Ferrari
DNS Jolyon Palmer, Renault
Pictures credit : EPA, Getty & Reuters