07 Feb 2019 02:05

inkhel

Badminton team leh Table Tennis team te hlawhtlinna lawmpuia ni

Pu James Lalramnghaka, AE kaihruaina hnuaia Mizoram Badminton team leh Table Tennis team lawmpuina hun chu February ni 7, Ningani chawhma dar 11:00 khan Infiammite Inpui, MSSC Office-ah neih a ni a, he huna khual lian MSSC Secretary C.Laltlanthanga chuan, " Kan rilru hi a laimu a ni a, mi-ah kan innghat tur a ni lova, keimahniah kan innghat ngam tur a ni. Chutianga inringtawk thei tur chuan kan inbuatsaih a ngai a, chu chu hlawhtlinna bul a ni" a ti.

" Tunlai khawvelah thuawihna ringawtin hlawhtlinna min thlenpui thei tawh lova, kawng zahve thlenna chauh a ni. Coach-ten tih tur min tuk bak piah lamah nasa zawka kan beih a ngai a, chutiang mite chauh chu an hlawhtling thei thin.

" Football khelmual nei tha veng an thiam ber chuang lova, Indoor Stadium nei tha veng an tha ber chuang hek lo. Miin tum tak takna a neih chuan hmun hla leh hnai pawh nise a pan a, hmasawn thei turin theihtawp a chhuah mai thin" a ti.

Pu Tlana chuan Table Tennis leh Badminton game khel thinte an vannei a, a chhan chu point 1 zel inchuhah game tluan khelh ngai chi a nih vang a ni. A tira chak lo tan pawh game dangah a lehthal theih. Contact sports-ah chuan Mizoram atanga India chhim tawpa fight tura kal kha, vawi khat tawh hlekah a chak lo nghal thei a, a lehpek beisei tur a awm ve tawh lo" tiin Mizoram mai ni lo, India tihmingthatu ni zel turin TT player leh Badminton player te a chah.

43rd Indian Masters (Veteran) Badminton Championships, kum 35 chin chunglamte puala Badminton Association of India-in a buatsaih, Jananuary ni 28 atanga February ni 3 chhunga neihah Mizo player chhuanvawr Lalmuanawma, Hlimen chu a champion zo lova, silver medal a dawng.

Muanawma hi 35 + ah champion lai a ni a, champion leh tura rinkai nimahse a inhliam avangin final a khel zo thei lo tep a, final-a a khingpui Himachal Pradesh player Yogesh Chauhan lakah a chak ta lo.

Goa-ah hian Mizoram atangin players 27 an kal a, chung zinga players 4 chuan qualifying khelin main draw an lut a. Muanawma tih loh player dangten medal an dawng pha lo. World championship-a India aiawha kal tawh F.Zokima chu seeded No.2 niin quarterfinal-ah a vanduai hlauh mai a, Zabiakthara leh K.Lalthlamuana te pawhin 55+ mens doubles-ah quarterfinal an paltlang zo lo bawk. Anni bakah hian 50+ ah C.Lalzahngova chuan pre quarterfinal a thleng bawk a ni.

Semifinal lut chinten kumin September-a World Senior Badminton championship, Poland-a neih turah India ai an awh ang.

80th Junior & Youth National & Inter State Table Tennis championship 2018 chu Dec. 25-30, 2018 chhungin Sonepat, Haryana-ah neih a ni a, Mizo rawltharten beisei pha lo mahse medal an rawn hawn thei hram.

Mizoram Junior team - Jeho Himnakulhpuingheta, Alberto LR Ruata, John Zamliana leh Khamlianthanga-ten bronze medal an dawng a, doubles-ah Alberto LR Ruata leh John Zamliana ten bronze medal an dawng bawk.