24 Jun 2019 05:53

inkhel

Ba rulh nan Boris Becker-a’n a trophy a lilam dawn

German tennis legend Boris Becker chu a hun laiin a ropui hle a, mi tam tak chuan a dinhmuna din ve theih an chak thei hle a. Tunah erawh a tlachhe ve ta hle a, sum a neih loh avangin leiba a ngah chho a, a leiba rulhna atan a trophy neih sa thenkhat chu a lilam hial a ni.

Wimbledon champion ni thei naupang ber, Boris Becker hi kum 17 a nihin a champion a, he trophy hi vawi thum chu a la thei a. A vanglai hian trophy chi hrang hrang 82 zet a la hman a, medal, cup, sana leh thlalak thenkhatte chu a leiba rulhna tur hian lilam a titlu a. Vawiin atangin British firm Wyles Hardy chuan an lilam tan ang a, July 11 thleng khian an website kaltlangin an lilam ang.

Boris Becker hian trophy a dawn zinga a ngaihhlut pakhat, Wimbledon champion a nih hnua a dawn, Challenge Cup anga an siam chu a lilam tur zingah hian a telh a. Grand Slam singles champion ni thei naupang ber a nih tuma an pek Renshaw Cup lem an siam pawh a lilam tel dawn bawk a ni.

1990 khan Wimbledon final-ah Swede star Stefan Edberg nen an inkhel a, Becker chu a chak lo zawk niin, medal a dawng a. Hemi tuma a medal dawn leh 1989 US Open final-a Ivan Lendl a hneh tuma a dawn, jeweller lar Tiffany siam silver cup lem an siam te pawh lilam atan hian a chhawp chhuak bawk.

Kum 51-a upa Boris Becker hi 2017 khan bankrupt a puan a ni a. June 2018-ah khan politics lamah a invawrh chho a, hei vang hian tlemin a sum dinhmun pawh a zia leh hret a. Hetih lai vel pawh hian a thil neih lilam hi a lo rilruk tawh a, hetianga dinhmun sang deuh hleka a awm tak avang hian a thulh leh rih a ni.

World No. 1 hlui Becker hian European Union hnuaia sporting, cultural humanitarian attache angin Central African Republic President chuan a ruat niin a sawi a. Central African Ministry of Foreign Affairs chuan hemi chungchang hi an chhang let a, Boris Becker-a passport chu a lem a nih thu sawiin, 2014 a blank passport an ruk chhuah zinga mi kha a nih thu an sawi.

Nikum December thlaah khan Becker chuan a chungthu hi a titawp a, London court hmaah thubuai a neih angte chu ching felin, a bungraw neih ho lilam tur hian thu an titlu ta a ni.

Becker hian leiba hi pound maktaduai chuang fe a nei a, a thil neihte hi lilam mahse ba rulhna atan hian a tawk dawn chuang lo a. Spain ramah pawh leiba hi a nei nual a, Mallorca khuaa a in an khawihna man pawh a la pe tla lo a, hei vang hian Spanish court chuan thubuai a siamsak bawk a ni.

2009 khan Becker hian nupui a nei a, hemi tuma inneihtirtu pastor chuan Switzerland rama court-ah thubuai a thehlut a, pawisa tam tham tak chawitir a ni tawh a. German rama court pawhin 2002 khan thubuai an siamsak a, thiamloh chantir niin chhiah pek that loh vangin pawisa tam tham tak an chawitir bawk a ni.

Vawi 6 ngawt Grand Slam champion lo ni tawh ‘Boom Boom’ Becker hian a vanglaiin title 49 lain, hengah hian lawmman pawisa fai €20 million chuang zet chu a la hman a ni.