13 Aug 2019 01:29

bakteaJr.

Mizo tlangval

​Azpi-a’n Mount leh Abraham a chhan

Chelsea chuan tun season-a an game hmasa berah Manchester United tum nghalin si li faiin an tlawma, he inkhelah hian Chelsea manager thar Frank Lampard chuan Blues academy mi player dah luh a nei nual.

Chelsea academy player Mason Mount leh Tammy Abraham-te chuan United lakah inkhel bul tanin, Mount hi Premier League-a a vawi khat khelhna a ni nghe nghe.

Kum 20 mi Mount hi season liamta khan Derby County-ah Lampard-a hnuai tho ah hian loan-in a khel a, a khel tha hle a, Lampard chuan Chelsea lamah pawh hman rim a tum chhoh hmel viau niin a lang.

Kum 21 mi Abraham hi Premier League lamah a lo inlan ve nual tawh a, United lakah hian a tir lamah che tha thawkhat viauin si ban pet per hial mahse a naupanna leh tawnhriat a neih loh a lang a tih theih.

Vawi hnih ngawt Chelsea lo enkawl tawh Jose Mourinho chuan Lampard-a first XI thlan a sawisel deuha, player naupang Mount leh Abraham-te chu United laka inkhel bul a tan tir mai chu a ti dik lo niin Portuguese pachal hian a sawi.

Chelsea captain Cesar Azpilicueta erawhin an manager hlui ngaihdan hi a tawmpui ve lem lova, Mount leh Abraham-a te thlavang a hauh thung. Azpilicueta chuan, “Kan hnenah Mason leh Tammy-te hi an awm a nih chuan an phu tawk tihna ni a, training kan neih apiangin rim takin an beia, an chungah rinna kan nghat ngam a ni.

“Heng player naupangte hi an tet te atangin Chelsea first team tana khel turin an bei a, tunah hian hun tha tak an nei a, game tin atangin an inzir zel dawn. An bul tan dan kha duhthusam ni lo mahse, kha game atang khan nasa takin an inzir phah dawn a ni,” a ti.