​Azerbaijan Grand Prix-ah Hamilton pakhatna

30th April 2018, 02:04AM

Circuit hrang hrangah pakhatna lo ni tawh thin mahse Baku-ah kher kher hi chuan Hamilton pakhatna a la ni lo, Azerbaijan Grand Prix hmuhnawm takah beisei loh Lewis Hamilton chu pakhatna a vawi khat nan a ni ta a ni.

Ferrari driver Kimi Raikkonen chu pahnihna niin kum hnih hnuah Force India driver Sergio Perez chuan podium a chuangkai leh ta hlawl bawk a. Pole atanga bul tan Sebastian Vettel erawh vanduainain a tlakbuak a, palina a ni ta a ni.

Pole atanga bul tan Vettel a tlan tha hle a, harsatna a awm loh chuan pakhatna ni ngei tura rin a ni. Lap 28-ah pit stop neiin Bottas chuan hetah hian a lehpel a, Bottas-a'n pit stop a neih ve hunah Vettel chu hmahruai lehnghal mai tur nia rin a ni. Bottas erawh a la tlan ngar ngar mai. Hetih lai hian Red Bull car pahnih an insut avangin Safety Car a tlan tlat mai le.

Vettel vanduai chhan Red Bull

Daniel Ricciardo chuan kawng ngilah a team-mate Max Verstappen pelh tumin a um, Verstappen chuan Ricciardo inpelh tir a phal mai bik lo, kawi hmasa ber an thlen dawnah Max chu a tlanmuang, hei tak hi Ricciardo chuan a hnungah a va su ta bur a, Red Bull car pahnih an OUT ta.

Safety Car a rawn tlanchhuak ta, hetah tak hian Bottas dinhmun a lo tha tawh bawk nen, pit stop a nei a, a chhuah leh chuan Safety car tlan laia inpelh phal a ni tawh ta si lova. Bottas chuan hma a hruai tan ta.

Kum 2010 Turkish Grand Prix-ah pawh khan Red Bull driver pahnih Sebastian Vettel leh Mark Webber te chu insuin an lo OUT ve ve tawh a nih kha. Azerbaijan GP-ah pawh a thleng leh ta chiah a. An driver pahnih chetsual dan chungchangah Red Bull team chuan an dirver-te an dem lo ve ve a, chak zawk nih tuma theihtawp an chhuahna chu an ngaihhlut thu an tarlang nghe nghe.

Dinhmun tha tak atangin Bottas a vanduai

Safety car tlan laiin French driver Grosjean chu a lo chesual ve ringawt, hei vang hian safety car tlan chhung a tihrei phah. Lap 51 tlan turah Lap 4 chiah a awm tawh tihin safety car a chhuak ta, Bottas chu pakhatna a ni chho ngei tawh dawn niin a lang. Vettel chuan a hmaa a dinhmun ngai hauh leh tumin na takin a nawr, kawng ngilah chak takin a um, kawiah a brake tlai hret a, Bottas chu a pel hman, mahse mawi taka kual nan a tlan chak mah mah, a kual zau ta a. Hetah tak hian Hamilton leh a team-mate Raikkonen-te chuan an pel a.

Hamilton a vannei ta

Lap hnih chiah a awm tawh, Bottas chuan car dang chetsualna keh them a tawng palh hlauh mai, a ke a puncture palh ta hlauh mai, pakhatna ni tura rin ni mahse a tlan chhuak zo ve ta lo. Vettel chuan podium chan ngei tum mahse Force India driver Perez chuan a rawn tlanpel ve leh a. Intlansiak tawp thlengin buaina dang a thleng tawh lo, nikum October thlaa US Grand Prix-a pakhatna a nih hnuah a vawi khat nan British driver Lewis Hamilton chu pakhatna a ni leh ta a ni.

Azerbaijan GP race result :

1) Lewis Hamilton (Mercedes)

2) Kimi Raikkonen (Ferrari)

3) Sergio Perez (Force India)

4) Sebastian Vettel (Ferrari)

5) Carlos Sainz (Renault)

6) Charles Leclerc (Sauber)

7) Fernando Alonso (McLaren)

8) Lance Stroll (Williams)

9) Stoffel Vandoorne (McLaren)

10) Brendon Hartley (Toro Rosso)

11) Marcus Ericsson (Sauber)

12) Pierre Gasly (Toro Rosso)

13) Kevin Magnussen (Haas)

Retired:

Daniel Ricciardo (Red Bull)

Max Verstappen (Red Bull)

Esteban Ocon (Force India)

Nico Hulkenberg (Renault)

Romain Grosjean (Haas)

Valtteri Bottas (Mercedes)

Sergey Sirotkin (Williams)

Copyright © inkhel.com 2024. All rights reserved.