Intlansiak mak dangdai tak Baku, Azerbaijan-ah neih a ni a, chesual an awm nual a, safety car vawi thum tlan tir a nih bakah intlansiak restart a ni bawk. Tin, chawl tawhte pawh restart-ah hian tlan that tir an ni a, Daniel Ricciardo pakhatna a ni a, Bottas pahnihna niin Stroll chuan podium a chang hlauh a, a lawm kher mai.
European GP-ah hian Hamilton chuan pole atangin bul a tan, tlan pawh a tlanchhuak tha hle. Bottas chuan a zui a, Kimi Raikkonen chuan Bottas pelh a tum laiin Bottas chuan Kimi hi a nek a, a chhe nual, Bottas a chhe hnem zawk a, pit-ah a luh avangin a mawng lamah intlansiak a zawm leh.
Hamilton leh Vettel te chu an inum zak zak a, safety car hnunga an tlan laiin an intibuai. Kawiah Hamilton chu a tlanmuang, chu chu Vettel chuan a hnung a va su, Vettel a thinrim hle, a sut tur kherin Hamilton a tlanmuang niin a ngai, Hamilton zawnah tlanin a car chuan a nek ta a, he thil thleng hi a dangdai hle a, sawi pawh a la hlawh chho dawn chauh a ni.
A khawsak dan a mawi loh avangin Vettel chu second 10 penalty pek a ni a, an pahnih hian pit-ah an lut ve ve a, Vettel chu a chungnung zawkah a tang ta. Lewis Hamilton chu 5-na a ni a, Vettel chu 4-na a ni a, Vettel chuan championship-ah hma a hruai chhunzawm zel a, Hamilton hian point 14 in a phak lo mek. Intlansiak vawi 21 awm turah vawi 8 an tlan tawh, a chanve pawh an la tlan lova, tun season chu a hmuhnawm chho dawn hle mai.
Intlansiak zawhah Vettel chuan, "A Brake a test dan kha ka lawm lo hle, a zawnah ka va tlan a, hauh pahin ka ban ka phar chhuak, kan lo intawk palh a ni e.
"Ka hma thla a chhia a, ani erawh a chhe mang lo. Khatiang chiah khan China-a restart kan neih pawhin a ti tawh, khatianga tih tur kha a ni lo asin mawle.
"Hmahruaitu chuan Safety car leh a hnung amite ngaihtuah ranin a khalh tur chu a ni alawm. Chutih laiin a tlan vak a, na takin a brake leh thut a, kei khan ka hmuh veleh ka brake, mahse a ding thei tawh lo, thil tullo tak a ni," tiin a sawi.
Hamilton chuan, "Brake ka test a ni lo, safety car nena kan inkar ka vawng a ni mai zawk. Amah kha a lo muthlu zawk a ni ang e, amah leh amah a intimualpho a ni ber mai.
"Mipa tak tak a nih chuan car atanga chhuakin kan inhmachhawn ang chu, khatiang khawpa hlauhawma khalh kha chu midang tan pawh a hlauhawm khawp mai.
"Kan tlanmuan lai a ni hlauh a, kan tlan chak lai ni ngat selang chuan chhiatna nasa tak a thlen thei a ni. Tin, han ngaihtuah la, naupang tam takin an lo en ve mek bawk a, khang nungchang kha chu vawi 4 lai World Champion lo ni tawh tan chuan a mawi lo a ni," tiin a sawi.
Azerbaijan GP Race Result
1. Daniel Ricciardo, Red Bull, 2:03.55.573
2. Valtteri Bottas, Mercedes, +3.9
3. Lance Stroll, Williams, +4.0
4. Sebastian Vettel, Ferrari, +5.9
5. Lewis Hamilton, Mercedes, +6.1
6. Esteban Ocon, Force India, +30.2
7. Kevin Magnussen, Haas, +41.7
8. Carlos Sainz, Toro Rosso, +49.4
9. Fernando Alonso, McLaren, +59.5
10. Pascal Wehrlein, Sauber, +89.0
11. Marcus Ericsson, Sauber, +91.7
12. Stoffel Vandoorne, McLaren, +92.1
13. Romain Grosjean, Haas, +1 lap
DNF Kimi Raikkonen, Ferrari
DNF Sergio Perez, Force India
DNF Felipe Massa, Williams
DNF Nico Hulkenberg, Renault
DNF Max Verstappen, Red Bull
DNF Daniil Kvyat, Toro Rosso
DNF Jolyon Palmer, Renault