Rafael Nadal chuan a khingpui Yannick Maden chu second round-ah a hneh a, French Open third round a inhlang kai.
Roland Garros-a vawi 11 ngawt champion thei Rafael Nadal chu Yannick Maden nen an inkhel a, Nilainia inkhelah hian harsa lo takin Nadal chu 6-1, 6-2, 6-4 in a chak a, French Open third round a lut thei a ni.
Court Suzanne-Lenglen ah hian Spaniard chuan a nghawng lenna hmun a ni tih hriain a inring tawk hle a. An inkhelh tan phat atangin a hmaa ding Maden chu a nawr na nghal viau a, tihsual pawh a nei tam lo hle.
Set hmasa berah Nadal chu a chungnung chiang viau a, a tawpah 6-1 in set a la zui a. Set hnihnaah pawh chanchin a danglam tam lo hle a, Yannick Maden chu a che ve thei meuh lo a tih theih hial a. Set hnihna pawh Nadal hian 6-2 in a la zui leh bawk a ni.
Set thumna an khel chho leh a, Rafael Nadal chuan break theihna hun tha vawi hnih a bawhpelh a, heti chung hian set thumna chu 6-4 in a la ta tho a. Darkar khat leh minute 43 an inkhel a, Nadal hi 6-1, 6-2, 6-4 in a chak a, last 32 a inhlang kai thei ta a ni.
Nadal hi Roland Garros bikah chuan vawi 88 a chak tling thei ta chiah a, hetiang zat chak thei tur hian Nadal chuan Paris khawpuiah hian match 90 a khel tling chiah bawk a. Major singles-ah chuan hetiang zat match khel thei palina niin, a hmain Jimmy Connors, Roger Federer leh Andre Agassi te chuan an lo puitlin tawh a ni.
Kum 32-a upa Nadal chuan service atangin set khatnaah point 7 chauh a hloh a, break point a pe lo a, a khingpui German player chu tihsual a neihtir thei nual bawk a ni.
Rafael Nadal leh Yannick Maden te inkhelh hma hian Stefanos Tsitsipas chuan Hugo Dellien chu 4-6, 6-0, 6-3, 7-5 in a hneh a, Tsitsipas hian French Open third round a thleng chho ve bawk a ni.
STATISTICAL BREAKDOWN
Rafael Nadal [2] bt Yannick Maden 6-1 6-2 6-4.
WINNERS/UNFORCED ERRORS
Nadal - 43/23
Maden - 15/20
ACES/DOUBLE FAULTS
Nadal - 3/3
Maden - 1/1
BREAK POINTS WON
Nadal - 7
Maden - 2
FIRST SERVE PERCENTAGE
Nadal - 63
Maden - 63
PERCENTAGE OF POINTS WON ON FIRST/SECOND SERVE
Nadal - 73/61
Maden - 57/25
TOTAL POINTS
Nadal - 90
Maden - 56