Max Verstappen chuan tun season chhunga Formula One khawvela roreltu ni mek Mercedes leh Ferrari te chu khumin, Pathiannia Austrian Grand Prix-ah pakhatna a ni.
Red Bull driver Max Verstappen chuan intlansiak tawp dawn lamah a hmaa tlan Ferrari driver Charles Leclerc chu a lehpel a, pakhatna hi a ni thei a. Leclerc hi pahnihna niin, Mercedes driver Valtteri Bottas chu pathumna a ni.
Ferrari driver pakhat zawk Sebastian Vettel chu palina niin, drivers’ championship hmahruaitu, Mercedes driver Lewis Hamilton chu pangana a ni. McLaren driver Lando Norris chu parukna niin, Red Bull driver pakhat zawk Pierre Gasly chu pasarihna a ni a, McLaren driver Carlos Sainz chu pariatna a ni bawk.
Lewis Hamilton chu qualifying-ah an hrem avangin palina atangin a tlan tan a, an intlansiakah hian a tlan tha chho viau a, mahse a car front wing chu a tichhia a, thlak tura pit stop a pan avangin panganaah hian a awm phah ta a ni.
Sebastian Vettel pawh pit stop a luh hmasakin a che fuh chiah lo a, duh aia rei hun a hmang a, hei vang hian podium pawh a lawn thei ta lo a. Intlansiak laihawlah Charles Leclerc chuan hma a hruai chho a, a tawp dawn thlengin hma hi a hruai zel a, a vawi khatna atan pakhatna a ni dawn emaw tih hnuah midang a inlehpelhtir ta a ni.
Lap hnih chauh tlan tur an nei tawh a, lap 68-ah Verstappen chuan hmahruaitu Leclerc chu a lehpel a, hetia an inlehpelhna lamah hian an car ke chu a insi zui a. Heta thil thleng hi thuneitute chuan an enfiah leh dawn a, result pawh hi a danglam phah thut thei a ni.
Austrian Grand Prix result
1 Max Verstappen (Ned) Red Bull
2 Charles Leclerc (Mon) Ferrari
3 Valtteri Bottas (Fin) Mercedes GP
4 Sebastian Vettel (Ger) Ferrari
5 Lewis Hamilton (Gbr) Mercedes GP
6 Lando Norris (Gbr) McLaren
7 Pierre Gasly (Fra) Red Bull
8 Carlos Sainz (Spa) McLaren
9 Kimi Raikkonen (Fin) Alfa Romeo Racing
10 Antonio Giovinazzi (Ita) Alfa Romeo Racing
11 Sergio Perez (Mex) Racing Point
12 Daniel Ricciardo (Aus) Renault
13 Nico Hulkenberg (Ger) Renault
14 Lance Stroll (Can) Racing Point
15 Alexander Albon (Tha) Scuderia Toro Rosso
16 Romain Grosjean (Fra) Haas F1
17 Daniil Kvyat (Rus) Scuderia Toro Rosso
18 George Russell (Gbr) Williams
19 Kevin Magnussen (Den) Haas F1
20 Robert Kubica (Pol) Williams
Fastest Lap: Max Verstappen 1mins 07.475secs on lap 60