Caroline Wozniacki chuan thla thara Australian Open lo awm tur a khelh zawh hunah tennis khelh zui a tum tawh loh thu a sawi.

World No. 1 pawh lo ni tawh Caroline Wozniacki chuan Zirtawpni khan tennis khelh zui zel a tum tawh loh thu hi sawiin, Australian Open-ah chuan a la tel ang a, chumi zawhah chuan inkhelh chu chawlhsan a tum tawh niin a sawi a ni.

Kum 29-a upa Caroline Wozniacki chuan nikumah khan a vawi thumna atan tournament lian final a lut a, Melbourne-ah a champion a, Grand Slam singles title a lak awm chhun a ni.

Wozniacki chuan, “Tennis court chhunga tihpuitlin ka tum zawng zawng chu ka tipuitling ta,” tiin Instagram lamah a tarlang.

“A hma daih atangin ka rilru hi ka lo siam fel tawh a, tennis khelh piah lama thil dang tih chak em em ka neih hun a thleng a nih chuan chutiang hunah chuan ka thil tih chak zawng tak chu tih a hun tihna a ni ang tih hi ka ngaihtuah dan a ni,” a ti.

2005 kumah khan kum 15 mi chauh niin Caroline Wozniacki hi professional tennis huangah a zuang lut ve tan a. October 2010 ah khan khawvela player tha ber a ni tan a, kar 71 chhung zet chu WTA ranking-ah a chungnung ber a ni zui a ni.

A vanglaiin Wozniacki hian WTA title 30 zet chu a la tawh a, heng zingah hian Singapore-a 2017 Tour Finals title a lak kha a tel a ni.

World Top 20 huangah Wozniacki hi a zawnin season 11 chhung zet chu a awm thei a, 2019 chhungin beisei a pha lo hle a, inhliam neuh neuh te nen a tum angin tha thei lo hle a, final pawh vawi khat chiah a lut thei a, hei vang hian ranking thar berah pawh 37-na a ni.

Chawlh a sawi lan hnuah hian Caroline Wozniacki chuan chhungkaw tana hun hman tam a duh thu sawiin, a pasal, NBA champion lo ni tawh David Lee nen chhungkaw lampang ngaihpawimawh a tum thu a sawi a ni.