Australian Open ka khel lo ang - Del Potro

30th December 2016, 11:12PM

Del Potro chuan, “Thlaleha Australian Open leh New Zealand-a Auckland Classic ka khelh ka ringlo. Ka fitness-in duhthu a sam lo a, chawlh ka mamawh.

“Tennis huang chhungah season hnih chhung ka hmel ka lan mumal thei lo a, tunah ka chawlh leh rih a ngaih hmel. He infiamna hian kum hnih chhung min lo nghak tawh a, Australian Open chu a la awm leh dawn alawm,” tiin reporter-te hmaah a sawi.

Kum 2009 khan Potro hian Roger Federer hnehin US Open-ah a champion a, Kum 2010 khan a thlen san ber tawngin World No.4 a ni. Chumi hnu reilote-ah a banrek hliam avangin a chawl a, World ranking-ah a tlahniam chhunzawm nghal a.

Kum 2012 leh 2013-ah pangngai takin a inkhel leh thei a, Kum 2012-ah World No.7 leh 2013-ah World No.5 dinhmunah rawn inhlangkai lehin season a khar.

A tum hnih nan kum 2014 khan a banrek bawk tina lehin, 2014 leh 2015 season-ah a hmel hmuh tur a awm mang lo. Hliamin rei fe a tihbuai hnuah mumal takin kuminah kan hmu leh chauh a, 2016 season tha tak a hmangin, Olympic-ah final thlengin a vawikhatna atan Argentina chu Davis Cup-ah a champion pui bawk. Kumin season tan a nih khan Del Potro rank hi 1041-na niin season tawpah No. 38-naah a inhlangkai leh thei a ni.

Copyright © inkhel.com 2024. All rights reserved.