Australian Open champion Sofia Kenin

01st February 2020, 10:02PM

Sofia Kenin chuan Australian Open hmeichhe singles final-ah World No. 1 lo ni tawh Garbine Muguruza chu hnehin a champion.

Kum 21-a upa Sofia Kenin hian set khatna a hloh phawt a, a hnuah erawh tan a la chho a, a tawpah rin kai lo zawk chu 4-6, 6-2, 6-2 in a chak a, a vawi khatna atan Grand Slam title a la thei ta a ni.

Moscow khawpuia piang Sofia Kenin hi US lama seilian a ni thung a, a khelh danah Florida atanga chawr chhuak Maria Sharapova leh Monica Seles te khelh dan pawh a lang thei deuh a, tha taka khel chhoin darkar hnih leh minute 3 chhungin a khingpui, mi rin kai zawk hi a hneh a ni.

Kumin hmeichhe singles final-ah hian Top 10 player ni lo ve ve an intum a, 1968 hnuah chuan Top 10 huanga awm lo ve vein final an khelh leh hmasak ber a ni a, Sofia Kenin hian £2.2 million zet chu a dawng a ni.

Spanish star Garbine Muguruza chu tun tumah hian champion tura rin zawk a ni a, a tir lamah pawh a che tha zawk reng bawk a. Set hmasa berah 5-2 in hma a hruai a, a hnuah chuan 6-4 in set khatna hi a la thei a ni.

An khel rei tial tial a, Sofia Kenin chu a ziaawm chho telh telh a, set hnihna pawh harsa vak loin 6-2 in a la zui a. Set thumna an khelh leh pawhin American nula chu a chungnung zawk a ni chho zel a, 6-2 bawkin set chu a la zui leh bawk a ni.

Copyright © inkhel.com 2024. All rights reserved.