14 Dec 2019 03:09

inkhel

Australian Open-ah Top 50 an tel kim dawn

Kum thar January thlaah khian tennis inelna lar Australian Open chu an khel leh tawh dawn a, hetah hian mipa leh hmeichhe zinga Top 50 huanga awmte chuan tel an tum deuh vek hlawm a ni.

January ni 20 atanga February 7 chhung khian Melbourne Park-ah season bul tannaa Grand Slam event hmasa ber hi an khel dawn a. Top rank Rafael Nadal leh Ashleigh Barty te chu helai hmuna vawi 115 intihsiaknaah hian an tel dawn chiang a. World No. 3 lo ni tawh Juan Martin del Potro pawh a inlan ve leh tawh dawn.

Argentine tennis star Juan Martin del Potro hi a inhliam avangin thla 6 chhung zet mai a chawl a, thla thara Australian Open khelh turah chuan a tel ve thei tawh dawn a ni.

Australian Open-a vawi 7 lo champion tawh Serena Williams chuan a tel dawn a ni tih a tichiang tawh a, Melbourne Park-ah hian a vawi 24-na atan Grand Slam title lak theih ngei a tum dawn a, Margaret Court record siam chu nihrual theih ngei a duh a ni.

Thla tharah hian Margaret Court chawimawina hun an nei dawn a, Grand Slam title a lak atanga kum 50-na champha an lawmpui dawn a ni.

Serena Williams unaunu, kum 39-a upa Venus Williams pawh Melbourne Park-ah hian a inlar ve leh dawn a. Hmeichhe lamah hian Top 50 huanga awm si, tel lo tur pakhat chu a awm a, vawi hnih lo champion tawh Victoria Azarenka chu a chhan sawi chiang loin a inhnukdawk a ni.

Tournament director Craig Tiley chuan, “Infiammite zawng zawng chu Melbourne ah hian kan lo lawm vek a, felfai tak leh tha takin tournament hi a kal theih ngei kan beisei a ni,” a ti.

Kum 10 kalta chhung khan 2014 a Swiss star Stan Wawrinka a champion tih lohah chuan Novak Djokovic leh Roger Federer te chu helai hmunah hian an langsar hle a. Rafael Nadal chuan helai hmuna a title lak hmasak ber leh tun thlenga a lak chhun la ni chu 2009 ah khan a lo la bawk a ni.

Novak Djokovic chu Australian Open champion lai niin, title vawi 8-na lak a tum ngei dawn a. Hetih rual hian kum 38-a upa Roger Federer pawhin helai hmunah hian title 7 lak theih a tum ve dawn bawk a ni.

Hmeichhe lamah chuan kum 10 chhungin champion hrang hrang mi 7 an awm hman a, tuna title kawl mektu chu Japanese star Naomi Osaka a ni.

Champion hlui Caroline Wozniacki chuan tun hnaiah khan January thlaah chuan tel a la tum thu sawiin, tennis khelh a chawlhsan hmaa tournament a khelh hnuhnun ber a nih tawh tur thu a sawi a ni.