Australian Open hmeichhe singles final-ah Naomi Osaka chuan Petra Kvitova hnehin a champion a, World No. 1 a ni zui.

Japanese nula Naomi Osaka hian set khatna chu 7-6 (7-2) in a la a, set hnihnaah Petra Kvitova chu a chungnung ve thung a, 5-7 in set a la a. Set thumnaah Naomi hi 6-4 in a chak a, a vawi khatna atan Australian Open title hi a la thei ta a ni.

Inrinnia Melbourne Park-a inkhel boruak hi a tang hle a, set khatna an khelh atangin an inhnehtawk chho hle a, tie break an thleng nghal hial a. Tie break-ah hian Japanese star Naomi Osaka chu a chan a tha ta zawk a, 7-6 (7-2) in a chak a ni.

Vawi hnih ngawt Wimbledon champion lo ni tawh Petra Kvitova chu set hnihnaah a tang mar chho a, Czech star hian a zawna set hloh a tum lo bawk a, a tawpah 7-5 in set hnihna chu a la ve thung a ni.

Set thumna an khel leh a, an inrual chho leh viau a, mahse Naomi chu dinhmun tha zawkah ding chhoin 3-1 in hma a hruai a. Osaka hian a service that theih chu a chhawr hle a, a hnuah phei chuan 4-2 in hma a hruai zui a. Kvitova lahin awlsam taka chak loh a tum bik lo a, set thumnaah chuan chan chhe zawk ni mahse pawhthlak a tum chhunzawm zel a ni.

Darkar hnih leh minute 17 zet an inkhelh hnuah Naomi Osaka chuan set a la hnem ta zawk a, 7-6 (7-2) 5-7 6-4 a chakin 2019 Australian Open champion a ni ta a, World No. 1 a ni tel bawk a ni.

Naomi Osaka hi Asian tennis player, mipa leh hmeichhiaah pawh World No. 1 ni thei hmasa ber a ni a, Major title pahnih a kawl ve ta bawk a. Serena Williams leh Kim Clijsters te hnuah chuan Major title la zawn thei leh hmasa ber a ni a. Kum 21-a upa Naomi Osaka hi 2001 a American tennis star Jennifer Capriati hnua Grand Slam title la thei naupang ber a ni.