Kum khata tennis Grand Slam awm hmasa ber thin, karleh lehpeka tan mai tur Australian Open chu kumin 2017 atang hian prize money tihsan a ni dawn. Australian Open-a prize money hi a hma aiin 14% zetin a pung dawn a, heti hian prize money-a sum awm zawng zawng chu US $36 million lawih a ni tawh dawn ta a ni.

He tournament Director Graig Tiley chuan, “Mipa leh Hmeichhe singles-a chak berte hian $3.5 million an hum haw tawh dawn a ni.

“Hetianga prize money a pun chuan round hniam zawk leh qualifying khel-te pawhin hmathatna tam zawk an hmu dawn a, chu chu kan ngaih pawimawh em em thil a ni.

“Kan tum ber chu tennis hi infiamna hlawhtling tak ni zel se, mipa leh hmeichhe infiammite tan khawvel pum huap pawha eizawnna changtlung zawka siam zel hi kan duh a ni,” a ti.

Australian Open-ah prize money a pung a, tennis player-te tan lawmna tur a ni. Chutihrualin US Open nen chuan prize money hi a la inthlau rih khawp mai. US Open-a sum thehchhuah zawng zawng chu US $46.3 million a ni a, hetihlai hian French Open-ah chuan US $33.3 million niin Wimbledon-ah US $34.7 million a ni thung. Australian Open-ah pawisa a pun takah chuan heng US, French leh Wimbledon-ah te hian kumin chhungin lawmman a pun belh ve ngei a rinawm.

Australian Open 2017 Prize Money:

Men’s Singles:

Winners – $3.8m

Runner-ups – $1.9m

Women's Singles:

Winners – $3.8m

Runner-ups – $1.9m

Men's Doubles:

Winners – $650,000

Runner-ups – $325,000

Women's Doubles:

Winners – $650,000

Runner-ups – $325,000

Mixed Doubles:

Winners – $150,500

Runner-ups – $75,500